Baıqońyrda qalalyq basseınde bolǵan bala óliminiń sebebi ataldy

BAIQOŃYR. QazAqparat – «Baıqońyr» kesheniniń prokýratýrasy qaladaǵy «Orıon» basseınindegi toǵyz jasar balanyń ólimine qatysty tergeýdi jalǵastyryp jatyr, dep habarlaıdy QazAqparat tilshisi.

Qaıǵyly oqıǵa 2022 jyldyń 22 jeltoqsanynda saǵat 14:40 shamasynda bolǵan. «Orıon» basseıniniń dırektory Elena Volkovanyń aıtýynsha, josparly sabaq kezinde balalardyń biriniń jaǵdaıy kúrt nasharlaǵan. Ol sýda júrgende esinen tanyp qalady. Mekemeniń medıtsına qyzmetkerleri men nusqaýshylary balany tez arada sýdan shyǵaryp, dereý kómek kórsetýge kirisken, jedel járdem shaqyrǵan. Jedel járdem qyzmetkerleri balanyń qaıtys bolǵanyn aıtty.

«Júrgizilgen sot-medıtsınalyq saraptama sýǵa batý belgileriniń joqtyǵyn anyqtady, bala jalpy syrqattan qaıtys boldy», - dedi basseın dırektory.

Kýágerlerdiń aıtýynsha, bala basseınge ápkesimen kelgen. Belgili bolǵanyndaı, bala kardıostımýlıatormen júrgen.

«Baıqońyr» kesheniniń prokýratýrasy jarııalaǵan habarlamada balanyń basseınge barýǵa qarsy kórsetilimderiniń joqtyǵy týraly barlyq medıtsınalyq qujattary bolǵany aıtylǵan.

Atalǵan fakti boıynsha qaıǵyly oqıǵanyń mán-jaıyn jan-jaqty tekserý maqsatynda RF Tergeý komıtetiniń «Baıqońyr» keshenindegi tergeý bólimi qylmystyq is qozǵady. Qylmystyq is boıynsha tergeý jalǵasyp jatyr jáne ol «Baıqońyr» kesheni prokýrorynyń baqylaýynda.

Foto: Baıqońyr qalasynyń ákimshiligi