Baıqońyrda adamzattyń ǵaryshty ıgerýiniń 60 jyldyǵy qalaı atalyp ótiledi

BAIQOŃYR. QazAqparat - Baıqońyr qalasy ákimshiliginde Jerdiń birinshi jasandy seriginiń ushqanyna 60 jyl tolǵanyn atap ótý jáne daıyndyq boıynsha jumys toby qurylyp, óziniń birinshi otyrysyn ótkizdi, dep habarlaıdy «QazAqparat» HAA tilshisi.

Baıqońyrda mereıtoılyq saltanatty sharany uıymdastyrý jónindegi jumys tobynyń quramyna qala ákimshiliginiń, Roskosmostyń, ǵarysh salasyndaǵy kásiporyndar men uıymdardyń, «Baıqońyr» kesheninde QR Prezıdenti arnaıy ókiliniń qyzmetin qamtamasyz etý jónindegi basqarmanyń ókilderi kirdi.

Ákimshilik basshysynyń orynbasary Nıkolaı Adasev habarlaǵandaı, qazirgi tańda ǵarysh mereıtoıyna shaqyrý úshin Baıqońyr ǵarysh aılaǵyndaǵy ardagerler tizimin jasaý jumystary júrgizilýde, qala bul merekege deıin jańarady, negizgi saltanatty sharalar 2017 jyldyń 4 qazan kúni «Onjyldyq» qalalyq stadıonynda ótedi.

Qalalyq mádenıet jáne týrızm bóliminiń basshysy Janna Kım usynǵan josparǵa sáıkes, stadıonda qalalyq kásiporyndar men uıymdardyń qyzmetkerleri, ardagerler uıymdarynyń músheleri, oqýshylar men stýdentterdiń qatysýymen tematıkalyq sherý ótkizý josparlanǵan.

Merekelik is-sharada Baıqońyr qalasynyń ánuranyn shyǵarý ashyq konkýrsynyń jeńimpazdary jarııalanyp, Reseı men Qazaqstan estrada ártisteriniń qatysýymen úlken kontserttik baǵdarlama ótedi. Ortalyq alańda ótetin merekeniń keshki bóliginde «Baıqońyrdyń úzdik juby» konkýrsy ótedi. Jasandy Jer seriginiń ushyrylǵanyna 60 jyl tolýyna oraı, kóptegen tematıkalyq kórmeler, dárister, ǵylymı-praktıkalyq konferentsııalar, Baıqońyr ardagerlerimen kezdesýler, túrli baıqaýlar, mádenı-jappaı jáne sporttyq is-sharalar uıymdastyrylady.