Baıqońyr «Soıýz MS-11» ǵarysh kemesiniń ushyrylymyna daıyndalýda

BAIQOŃYR. QazAqparat - «Soıýz MS-11» basqarylatyn kemesi bar «Soıýz-FG» zymyran tasyǵyshy montajdaý-synaq korpýsynan shyǵarylyp, Baıqońyr ǵarysh aılaǵynyń №1 «Gagarın starty» ushý alańyna ornatyldy. Bul týraly QazAqparat tilshisi Roskosmos baspasóz qyzmetine silteme jasap habarlaıdy.

«Soıýz MS-11» basqarylatyn ǵarysh kemesin alyp ushatyn «Soıýz-FG» zymyran tasyǵyshy 2018 jylǵy 3 jeltoqsanda, Astana ýaqytymen 17:31-de ushyrylady. Starttan birneshe saǵat buryn bastalatyn tikeleı efırden ekıpajdyń daıyndyǵyn jáne ǵarysh kemesiniń ushyrylý sátin kórýge bolady.

HǴS-58/59 ekspedıtsııasy negizgi ekıpajynyń quramynda ǵaryshkerler - Oleg Kononenko, Davıd Sen-Jak jáne Enn Makkleın bar. Olardyń dýblerlary - Aleksandr Skvortsov, Lýka Parmıtano jáne Endrıý Morgan.

Búgin, 2 jeltoqsan kúni Baıqońyrda Memlekettik komıssııanyń otyrysy bolyp, onda ekıpajdyń quramy bekitiledi, keıin ǵaryshkerler ushý aldyndaǵy baspasóz máslıhatynda jýrnalısterdiń suraqtaryna jaýap beredi. Baspasóz máslıhatyn Roskosmos saıtynan jáne «VKontakte» jelisinen tikeleı efırden kórýge bolady.