Baıqońyr mektepterinde «Qazaq tili men ádebıeti» páni qashan engiziledi

NUR-SULTAN. QazAqparat - Baıqońyr mektepterinde «Qazaqstan tarıhy», «Qazaq tili men ádebıeti» pánderi qashan engiziledi? Májilis depýtattarynyń bul saýalyna QR Premer-Mınıstri Asqar Mamın jaýap berdi, dep habarlaıdy QazAqparat tilshisi.

Aıta keterligi, Májilistiń bir top depýtaty Baıqońyr qalasyndaǵy mektepterge «Qazaqstan tarıhy» jáne «Qazaq tili men ádebıeti» pánderin mindetti oqý páni retinde engizý máselesin kótergen bolatyn.

Osy máselege qatysty Úkimet basshysynyń jaýabynda bul jaıtty Reseı tarapymen pysyqtaý barysynda Baıqońyr qalasynyń ákimshiligi ony «Baıqońyr» kesheni jónindegi Úkimetaralyq komıssııanyń kezekti otyrysynda qaraýdy usynǵanyn aıtady.

«Bul rette, Reseı Federatsııasynyń Aǵartý mınıstrligine Reseıdiń jalpy bilim berý uıymdarynda «Qazaqstan tarıhy», «Qazaq tili men ádebıeti» pánderin oqytý múmkindigine qatysty resmı ustanym berý týraly suraý salý jiberildi. Osy ýaqytqa deıin Reseı Federatsııasynyń Aǵartý mınıstrliginen jaýap túsken joq», - dedi Premer-Mınıstr.