Baıqońyr qalasynan 10 sotyq jerdi tegin alý múmkin emes – AShM

NUR-SULTAN. QazAqparat – Aýyl sharýashylyǵy mınıstrligi jer resýrstaryn basqarý komıtetiniń tóraǵasy Murat Temirjanov Baıqońyr qalasynda Qazaqstan azamattary jeke turǵyn úı qurylysyna arnalǵan jer telimderin rásimdeı almaıtynyn rastady, dep habarlaıdy QazAqparat tilshisi.

«Baıqońyr qalasy Reseı Federatsııasynyń paıdalanýynda. Jer kodeksiniń 6-babynyń 7-tarmaǵyna sáıkes Qazaqstan aýmaǵynda basqa memleketterdiń jer paıdalaný quqyǵy Qazaqstan Respýblıkasy ratıfıkatsııalaǵan halyqaralyq sharttarǵa sáıkes týyndaıdy. Osyǵan baılanysty Baıqońyr qalasynyń aýmaǵynda jeke turǵyn úı qurylysy úshin jer ýchaskesin bólý múmkin emes», - dep jazylǵan komıtet basshysynyń jaýabynda.

QazAqparat saýalyna vedomstvodan joldanǵan jaýapta bir azamat birneshe óńirden jeke turǵyn úı qurylysyna arnalǵan jer telimin rásimdeı almaıtyny aıtylǵan.

«Jer ýchaskeleri jeke turǵyn úı qurylysy úshin Qazaqstan azamattaryna jeke menshikke tegin beriledi. beriletin jerdiń kólemi - 0,10 gektar (10 sotyq). Jeke turǵyn úı qurylysy úshin jer ýchaskelerin bir adamǵa qaıtadan tegin berý múmkin emes», - dep jazady Murat Temirjanov.

Atalmysh vedomstvonyń málimeti boıynsha, buryn 10 sotyq jerdi bireýden satyp alǵandar da tegin jer kezegine tura alady.