«Baıqońyr» ǵarysh keshenin damytýǵa qatysty taldaý jasalyp jatyr

NUR-SULTAN. QazAqparat – Elimizde «Baıqońyr» ǵarysh keshenin damytýdyń jol kartasy ázirlenedi. Ol úshin búginde ǵarysh aılaǵynyń bolashaq damýyna qatysty taldaý jumysy júrgizilip jatyr. Bul týraly QR Tsıfrlyq damý, qorǵanys jáne aeroǵarysh ónerkásibi mınıstrligi aeroǵarysh komıtetiniń tóraǵasy Baýbek Oralmaǵambetov málim etti, dep habarlaıdy QazAqparat tilshisi.

«Baıqońyr» ǵarysh aılaǵynyń búgini týraly aıtatyn bolsaq, keshennen ushatyn zymyrandardyń sany men júktemesi azaıdy. Qazirgi tańda Proton –M jáne Soıýz-2 zymyrany ǵana ushyrylady. Bizdiń aldaǵy maqsat – keshen jumysyn jetildirý jáne ınvestıtsııa tartý. Osy oraıda Baıqońyr kesheniniń bolashaqtaǵy damýyna qatysty taldaý qolǵa alyndy. Atalǵan zertteý jumysyna ǵarysh salasy boıynsha sheteldik bilikti kompanııalar tartyldy. Taldaý jumysy men sala mamandarynyń usynymdary negizinde Baıqońyr ǵarysh aılaǵyn damytýdyń jol kartasy ázirlenedi», - dedi Baýbek Oralmaǵambetov OKQ-de ótken baspasóz máslıhatynda.

Komıtet basshysynyń aıtýynsha, atalǵan ǵarysh kesheniniń bolashaǵyna qatysty taldaý jumysy eki baǵytta júrip jatyr.

«Birinshisi, ǵarysh kesheninen ushyralatyn zymyrandardyń qyzmetine qatysty. Ekinshiden, ǵarysh aılaǵyn týrıstik nysan retinde damytý. Sondaı-aq, joǵaryda aıtyp ótken taldaý jumysy arqyly «Baıqońyr» ǵarysh kesheniniń 10 jyldyq damýyna boljam jasalady. Ǵarysh salasy úshin 10 jyl azdyq etedi dep jatqandar bar. Onyń ózindik sebebi de bar, qazir zaman men talap kún sanap ózgerip jatyr. Jahan jyldam damyp jatyr, osy oraıda aldaǵy 20-30 jylǵa jasalatyn boljam ýaqyt óte kele mánin joǵaltýy múmkin», - deıdi ol.

Buǵan deıin Baýbek Oralmaǵambetov keler jyldan bastap elimizde jańa spýtnıktik ınternet qyzmeti synaqtan ótetini týraly málim etken edi.