Baıqońyr ǵarysh aılaǵynan «SES-6» ǵarysh apparatymen «Proton-M» zymyran-tasymaldaǵyshy ushyryldy

ASTANA. 3 maýsym. QazAqparat - Búgin Máskeý ýaqytymen saǵat 13.18-de Baıqońyr ǵarysh aılaǵy 200-inshi alańynyń ushyrý kesheninen «Brız-M» údetý blogy (ÚB) jáne «SES-6» telekommýnıkatsııalyq ǵarysh apparaty (ǴA) bar «Proton-M» (ǴAZ) ǵaryshqa arnalǵan zymyrany ushyryldy.

Bul týraly «Roskosmostyń» baspasóz qyzmeti habarlaıdy.

«Ushý tsıklogrammasyna sáıkes Máskeý ýaqytymen saǵat 13.28-de «Brız-M» údetý blogynyń (ÚB) jáne «SES-6» (ǴA) quramyndaǵy bas blok zymyran-tasymaldaǵyshtyń úshinshi satysynan bólindi», - dep aıtylǵan habarda.
Maqsatty orbıtaǵa ǵarysh apparatyn budan ári shyǵarý údetý blogynyń qozǵaltqysh qurylǵysy jumysynyń esebinen júzege asyrylady.