«Baıqońyr - bizge baq anyq, basqara alsaq, jaradyq» - respýblıkalyq basylymdarǵa sholý

ASTANA. 17 shilde. QazAqparat - Qazaq aqparat agenttigi respýblıkalyq basylymdarda 17 shilde, seısenbi kúni shyqqan ózekti materıaldarǵa sholýdy usynady.

 ***

«Egemen Qazaqstan» gazetiniń jazýynsha, keshe Astanada Qazaqstan Respýblıkasy Qorǵanys mınıstrliginde vedomstvo basshysy Ádilbek Jaqsybekovtiń tóraǵalyq etýimen alqa otyrysy bolyp ótti. Onda Qarýly Kúshterdiń sapalyq kórsetkishterine baılanysty bir­qatar máseleler qarastyryldy. Qatysýshylar kóktemgi áskerge shaqyrý naýqanyna baılanysty jaýyngerlik daıyndyq pen ás­ke­rı tártip, sondaı-aq, Qarýly Kúsh­terdegi dene tárbıesiniń qo­rytyndylaryn talqylady. «Á.Jaqsybekov jaýyn­ger­lik ázirlik boıynsha Qazaq­stan armııasy basty nazardy jeke quramnyń daıyndyǵyna aýda­ra­tyndyǵyn atap ótti. Búginde áskerler ártúrli urys qımyl­darynyń mańyzdy qashyqtyqta ótkiziletin áreketterin oqyp úı­renýde. Sol sebepti, dene tárbıesi ázirligi tek jeke áskerı qyz­metshilerdiń ǵana emes, jalpy bólimsheniń jaýyngerlik ázir­ligin anyqtaıdy», - dep jazady basylym. Maqala «Qaýipsizdik - basty nazarda» degen taqyryppen berilgen. 

«Elordadaǵy «Has Sanat» óner galereıa­synda ataqty frantsýz sýretshisi, músin­shi, kórkemsýret óneriniń doktory Saýlo Merkaderdiń jeke kórmesi ashyldy. Oǵan qylqalam sheberiniń 40-tan as­tam týyndysy qoıyldy»,-  dep jazady «Egemen Qazaqstan» gazeti búgingi sanyndaǵy «Abaı - meniń rýhanı ustazym» degen taqyryptaǵy maqalasynda. «Ol tek sýretshilikpen ǵana aınalyspaı, músinshilikti, jazýshy­lyqty da janyna serik etken biregeı talant. Bizdiń elimizge kelý barysynda ol uly Abaıdyń qara sózderin, óleńderin sonshalyqty qyzyǵýshylyqpen oqyp shyqty», - deıdi óner galereıasynyń dırektory Janna Eńsebaeva.

***

Kóp quramdy jańa Parlamenttiń alǵashqy sessııasy aıaqtalǵannan keıin de, deıinde el arasynda alyp-qashpa sóz kóp boldy. Májilismenderdi minegender de, synaǵandar, dattaǵandar da, maqtaǵandar da jetip artylady. Qalaı bolǵanda da halyq qalaýlylary qarap otyrǵan joq. Olar 70-ten astam zań jobasyn qarap, onyń 39-yn maquldady. Memlekettik til, bıýdjet máselelerin kún tártibine qoıdy. tipti Úkimetke senimsizdik jarııalaýǵa da oqtaldy. Osy jaıttardy qaperge alǵan «Aıqyn» gazeti saıasattanýshy Aıdos Sarymǵa birqatar saýal qoıyp, tuşymdy jaýap alǵan. Barlyq saýalǵa jan-jaqty jaýap bergen ol: «Taǵy bir másele, keıbir depýtattar, ásirese, kommýnıster qazaq qaýymyna jaqpaıtyn sózderdi aıtyp qalyp jatyr. Meniń oıymsha, bulardy eń aldymen óz áriptesteri ornyna qoıyp, júgendeýi kerek», - deıdi. Suhbat «Memleket te, ult ta - ózimizdiki» degen taqyryppen berilgen.

***

Mamandardyń baǵalaýy boıynsha, «Baıqońyr» ǵarysh aılaǵynyń tehnologııalyq qural-jabdyqtarynyń tabıǵı jáne moraldyq tozýynyń qalǵan merzimi shamamen taǵy da 10 jyldy quraıdy eken. Onyń Reseı aýmaǵyndaǵy «Vostochnyı» ǵarysh aılaǵy qurylysynyń belgilengen merzimine sáıkes kelýi kezdeısoq emes. Bul jaıynda «Alash aınasy» gazetiniń búgingi nómirindegi «Baıqońyr - bizge baq anyq, basqara alsaq, jaradyq» degen taqyryptaǵy maqalasynda aıtylǵan. «Endeshe, Reseı qansha jerden «biz Baıqońyrdan ketpeımiz» dep málimdep jatsa da, ǵarysh aılaǵyn túbinde ózimiz ıgerýge daıyn bolǵanymyz jón sııaqty», - dep jazady basylym. 

Osy basylymnyń turaqty «Dat!» aıdarynda Májilis depýtaty Tólegen Ibraevpen aradaǵy suhbat «Mal sharýashylyǵyna naǵyz kásibı kózqaras kerek» degen taqyryppen berilgen. Basylymnyń barlyq saýalyna egjeı-tegjeıli jaýap bergen halyq qalaýlysy: «Memlekettiliktiń basty belgisi, eldiń basty baılyǵy - jer. Óıtkeni jeri joq el, jeri joq memleket bolmaıdy. Jerdi saqtaý, ony aıalaý, sosyn ony ózimizdiń qaradomalaqtarymyzdyń ıgiligine jaratý eń basty paryzymyz. Sonymen qatar, jer azsa, el de azady. Sondyqtanda, jurtshylyq ishinde jerdi daýǵa saldyrǵanymyzdyń arty jaqsy bolǵany kerek», - deıdi.

***

Ataqty frantsýz sýretshisi, músin­shi, kórkemsýret óneriniń doktory Saýlo Merkader Elbasy N.Nazarbaevtyń portretin salý ústinde. Bul jaıynda «Astana aqshamy» gazeti jazdy. Taıaýda  elordada óziniń jeke kórmesin ótkizgen qylqalam sheberi basylym tilshisine bergen suhbatynda: «Týra qazirgi ýaqytta Parıjdegi atelemde Qazaqstannyń Prezıdenti Nursultan Nazarbaevtyń portretin salý ústindemin. Ol týyndy bir jyldan keıin bitip qalýy múmkin. Onyń qandaı antýrajda bolatyny ázirshe qupııa qalsyn. Bir jyldan soń osynda bas qosyp, ol qupııany aldaryńyzda ashatyn bolamyn», - depti ol.