Baıqońyr qalasynyń qazirgi jaı-kúıi qandaı

<p>Qyzylorda oblysynyń ákimi Nurlybek Nálibaev elordada eseptik kezdesýinde Reseıge jalǵa berilgen Baıqońyr qalasynda qandaı abattandyrý jumystary júrip jatqanyn aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Baıqońyr qalasynda jerlesterimiz kóp. Olarǵa barlyq jaǵdaı jasalyp jatyr. Buryn jabyq qala bolǵandyqtan kirip-shyǵý qıyndaý edi. Qazir onyń bári retteldi, eshqandaı shekteý joq. Qazirgi tańda jerlesterimizge arnap jańadan mektep pen balabaqshalar salynýda. Burynǵy balabaqshalardy da kúrdeli jóndeýden ótkizip jatyrmyz. «Jaıly mektep» jobasy aıasynda bir mektep Baıqońyr qalasynda salynady. Balalardyń bilim alýy, balabaqsha máselesi tolyq sheshilgen», - dedi Nurlybek Nálibaev Ortalyq kommýnıkatsııalar qyzmetinde ótken baspasóz máslıhatynda.

Sonymen birge, Baıqońyr qalasynyń káriz júıesin jańartýǵa aldaǵy eki jylǵa 12 mlrd teńge qarajat bólindi. Bul jumys kelesi jyly bastalady.

«Qazir Baıqońyr – sý júıesi jańarǵan, gaz tolyq kirgizilgen qala, endi káriz júıeleri jańartsa, ınfraqurylymǵa baılanysty másele bolmaıdy. Odan bólek, ótken aılarda Baıqońyr qalasynda tórt tarıhı tulǵalarymyzǵa kóshe ataýlaryn berdik. Olar – Mánshúk Mámetova, Álııa Moldaǵulova, Baýyrjan Momyshuly, Qorqyt ata. Sondyqtan Baıqońyr qalasynyń ákimshiligimen baılanysymyz óte jaqsy, másele týyndasa der kezinde sheship jatyrmyz. Ótken jyly sondaǵy qyzmetkerlerge kópqabatty turǵyn úıler salýdy bastadyq. Kezekte turǵan jerlesterimiz bar. Bul jumystar da kelesi jyly jalǵasady», - dep tolyqtyrdy N. Nálibaev.

Aıta keteıik, kelesi jyly Qyzylorda qalasyndaǵy Qorqyt ata áýejaıynyń jańa termınaly paıdalanýǵa beriledi.