Báıken Áshimovtiń jarqyn beınesi qazaqstandyqtardyń júreginde máńgi saqtalady

ASTANA. Aqpannyń 5-i. QazAqparat - Búgin toqsan úshke qaraǵan jasynda kórnekti memleket jáne qoǵam qaıratkeri Báıken Áshimuly Áshimov dúnıeden ótti.

Elbasy Nursultan Nazarbaev onyń dúnıeden ótýine baılanysty marqumnyń otbasy men týǵan-týystaryna kóńil aıtyp, jedelhat joldady. «Báıken Áshimov shyn máninde bilimdi, talantty, talapshyl, adamgershilik qasıetterge baı, asa bedeldi tulǵa bola bildi. Halqymyz onyń ónegeli ómiri men eńbegin umytpaıdy. Bul keıingi urpaqqa jaqsy úlgi bolýy tıis» - delingen jedelhatta.

Báıken Áshimov 1917 jylǵy tamyzdyń 10-ynda Aqmola oblysy Rýzaev aýdanyndaǵy Shabaqbaı aýylynda sharýanyń otbasynda ómirge keldi.

Ártúrli jyldarda Pavlodar temirjol fabrıka-zaýyt ýchılışesin, Soltústik Qazaqstan oblysyndaǵy Lenın agronomdyq-zootehnıkalyq aýyl sharýashylyǵy tehnıkýmyn, Lenıngrad zoologııa-fıtopatologııa ınstıtýtyn, sondaı-aq SOKP Ortalyq Komıteti janyndaǵy Joǵary partııa mektebin bitirdi.

Báıken Áshimov 1938 jyly Qyzyl Armııa qataryna shaqyryldy. Soltústik-Batys, Batys, I-Belorýs maıdanynda soǵysqa qatysyp, Varshava úshin shaıqasty, eki ret aýyr jaraqat aldy.

Soǵystan keıingi jyldary B.Á.Áshimov Kókshetaý oblysyndaǵy Aıyrtaý aýdandyq atqarý komıtetiniń hatshylyǵynan oblystyq partııa komıtetiniń ekinshi hatshysyna deıin ártúrli qyzmette boldy. 1961-1968 jyldary B.Á.Áshimov Qaraǵandy oblystyq atqarý komıtetiniń tóraǵasy, 1968-1970 jyldary Qazaqstan Kompartııasy Taldyqorǵan oblystyq komıtetiniń birinshi hatshysy bolyp saılandy.

1970 jyly Báıken Áshimov respýblıka Mınıstrler Keńesiniń tóraǵasy bolyp taǵaıyndaldy. Bul qyzmetti ol 1984 jylǵa deıin on tórt jyl boıy atqardy. Odan keıin B.Á.Áshimov respýblıka Joǵarǵy Keńesi Tóralqasynyń tóraǵasy - KSRO Joǵarǵy Keńesi Tóralqasy tóraǵasynyń orynbasary bolyp saılandy. SOKP Ortalyq Komıtetiniń múshesi, VIII jáne IX shaqyrylǵan KSRO Joǵarǵy Keńesiniń depýtaty bolyp saılandy.

Báıken Áshimov Qazaq KSR Mınıstrler Keńesiniń tóraǵasy qyzmetinde bolǵan kezeńde respýblıkada kásiporyndardy tehnıkalyq qaıta jaraqtandyrý, elektrlendirý, mehanıkalandyrý jáne óndiristi avtomattandyrý belsendi júrgizildi, jańa tehnologııalar engizildi. Kólik, energetıka, hımııa jáne jeńil ónerkásip, mashına jasaý salalary shapshań qarqynmen damydy, Qazaqstannyń ekonomıkalyq áleýeti arta tústi.

Báıken Áshimov qaı jumysta da ózin elimizdiń damýyna eleýli úles qosqan tamasha uıymdastyrýshy jáne talapshyl basshy retinde kórsete bildi.

Otan aldyndaǵy sińirgen eńbegi úshin Báıken Áshimuly Áshimov Sotsıalıstik Eńbek Eri ataǵyna ıe boldy, 4 ret Lenın ordenimen, basqa da ordendermen jáne medaldarmen marapattaldy.

B.Á.Áshimov ómiri ónegege toly, ishki mádenıeti asa joǵary, halqyna qadirli, eline syıly qazaqtyń shyn mánindegi zııalysy boldy. Ómirlik jary Baqyt Ásetqyzy ekeýi uzaq ta ulaǵatty ǵumyr keshti, ul men qyz tárbıelep, nemereler súıdi. Al, ómiriniń sońǵy jyldarynda ultymyzdyń qadirli aqsaqaly retinde kórgen-bilgenin jastarǵa ósıet etip, aqyl-keńes berýden esh jalyqqan emes.

Báıken Áshimulynyń jarqyn beınesi barlyq qazaqstandyqtardyń júreginde halqynyń adal da asyl azamaty retinde uzaq ýaqyt saqtalatyn bolady.