Báıdibekte tasqyn sý ortasynan qutqarylǵan júkti kelinshektiń jaǵdaıy birqalypty
Eske sala keteıik, budan aldyn Túrkistan oblysynda tasqyn sý ortasynda qalǵan júkti áıel men balany aýyl ákimi beline arqan baılap alyp shyqqanyn jazǵan bolatynbyz.
Keıin qutqarylǵan Qaınarbulaq eldi mekeniniń turǵyny Gúlnaz Nurbekova Báıdibek aýdandyq ortalyq aýrýhanasyna jetkizildi.
Báıdibek aýdandyq ortalyq aýrýhanasy terapııa bóliminiń meńgerýshisi Nurjan Jumaǵulovtyń aıtýynsha, naýqastyń jaǵdaıy birqalypty, bolǵan jaǵdaıdan shoshyp qalǵan.
Júktiliktiń alǵashqy kezeńi bolǵandyqtan turaqty baqylaýda bolady.
Eske sala keteıik, óńirdegi Kentaý, Túrkistan qalalarynda jáne Báıdibek, Saýran, Ordabasy aýdandarynda jaýyn-shashynnan kósheler men aýlalardy sý basqan edi.
Tasqyn sý Saýran aýdanyndaǵy eldi mekenderge qaýip tóndirdi. Sý tasqynyna baılanysty Saýranda mektep oqýshylary onlaın oqýǵa kóshti jáne 7 balabaqsha jumysyn toqtatty.
Óńirde kóligimen tasqyn sý ortasynda qalyp qoıǵan turǵyndar qutqaryldy.
Turǵyndar úshin «jedel jeli» iske qosyldy.
Keshe Túrkistan oblysynyń sý basqan aýdandaryn áýeden barlap shyqqan Tótenshe jaǵdaılar mınıstrligi eshqandaı qaýip joq ekenin málimdedi.
Ashyq kózderden alynǵan foto