Báıdibekte kópbalaly otbasyna bes bólmeli baspananyń kilti tabys etildi

BÁIDІBEK. QazAqparat – Túrkistan oblysy Báıdibek aýdanynda turmysy tómen otbasyna baspananyń kilti tabys etildi. Shaqpaq eldimekeninde turatyn tórt balanyń ákesi Baqytjan Yntybaevqa bes bólmeli úıdi jergilikti kásipker tartý etken, dep habarlaıdy QazAqparat tilshisi.

Jomart jandardyń biri Erbolat Myrzabekov kópbalaly otbasyna turǵyn úıdi óz qarjysyna satyp alyp bergen. Baspananyń kiltin saltanatty tabystaý rásimine aýdan ákiminiń orynbasary Baǵdatbek Janǵazıev qatysyp, qonystoı ıesi Baqytjan Yntybaevqa estelik syılyq tartý etti.

Al, oblystyń bas ımamy Musabek Aqtamberdi «El úlesi - páterge» jobasy boıynsha Báıdibek aýdanyndaǵy 197-shi baspana qutty bolsyn dep saltanatty túrde turǵyn úıdiń kiltin tapsyrdy. Kópbalaly ana Gúlnur Dosjanovanyń qýanyshynda shek joq. Ol meıirimdi jandarǵa alǵysyn aıtyp, balalarynyń óz bólmesi bolatynyna qýanyp jatty.

Kásipker sondaı-aq Baqytjan Yntybaevty óziniń jeke sharýashylyǵyna maýsymdyq jumysqa qabyldaǵanyn jáne qazir traktor júrgizip jatqanyn jetkizdi.

Aıta keteıik, únemi qaıyrymdylyq jasaýdan shet qalmaıtyn Erbolat Myrzabekov aýdandaǵy muqtaj jandardy azyq-túlikpen qamtamasyz etip keledi.