Báıdibek aýdanynda batyr ana asyl tuqymdy mal ósirýde

BÁIDІBEK. QazAqparat – Túrkistan oblysy Báıdibek aýdanyna qarasty Bógen aýylynda batyr ana asyl tuqymdy mal sharýashylyǵyn damytyp otyr. Ońlasyn Qulataeva «Sybaǵa» memlekettik baǵdarlamasy arqyly Avstralııadan «Aberdın angýs» asyl tuqymdy buqasynan 3 bas ákelip, qoldaǵy qazaqy sıyrlardy asyldandyrýmen aınalysýda, dep habarlaıdy QazAqparat tilshisi.

Búginde 70 jasqa kelgen zeınetker «Qýanysh» sharýa qojalyǵyn basqaryp, 1999 jyldan beri asyl tuqymdy mal basyn kóbeıtýde. Búginde sharýa qojalyqtyń ıeliginde 2700 bas asyl tuqymdy qoı men 250 jylqy, 160 bas múıizdi iri qara bar. Ol «Altyn asyq», «Sybaǵa» jáne «Agrobıznes – 2020» memlekettik baǵdarlamalaryna qatysyp, 3 dana dońǵalaqty traktor men shóp daıyndaýǵa qajetti tehnıka alǵan. Qazir 15 gektar jerge jońyshqa egip, mal azyǵyn qamdaýda. Búginde 6 otbasyn, ıaǵnı 12 adamdy jumyspen qamtyp otyrǵan batyr ana sharýaqorlyqtyń, tynymsyz eńbektiń arqasy bolar áli de tyń, áli de shıraq.

«Jubaıym Atymtaı Erdenov ómirden erte ketti. Mine, sodan beri barlyq sharýanyń basy-qasynda ózim júrem. Ulym Qýanysh ta qolqanat bolyp, sharýashylyǵymyzǵa kómektesip otyrady. Degenmen onyń memlekettik qyzmettegi jumysynan qoly bosaı bermeıdi. Sondyqtan malshyny da, shópshini de aqysyn berip, aýyl arasynan jaldaımyz», - deıdi Ońlasyn Qulataeva.

Sharýa qojalyq ıesi sondaı-aq, jylqyshyǵa 120 myń, sıyrshyǵa 80 myń, qoıshyǵa 110 myń, jeke mal dárigerine 80 myń, traktorshyǵa 80 myń aılyq jalaqy tólep otyrǵanyn aıtady.