Báıdibek aýdanynda aýyl jastary úshin fýtbol alańy ashyldy

BÁIDІBEK. QazAqparat – Túrkistan oblysy Báıdibek aýdanynda aýyl jastary úshin jańadan fýtbol alańy ashyldy. Shaqpaq eldi mekenindegi mektepten túlep ushqan túlekter alańnyń ashylýyna demeýshilik jasap, zaman talabyna saı salǵyzyp berdi, dep habarlaıdy QazAqparat tilshisi.

Elbasynyń «Bolashaqqa baǵdar: Rýhanı jańǵyrý» atty baǵdarlamalyq maqalasy aıasynda paıdalanýǵa berilgen alańnyń ashylý saltanatyna aýdan ákimi B.Tanagózov pen Shaqpaq aýylynyń turǵyndary qatysty.

Aýyl aqsaqaldary demeýshilerge alǵysyn bildirip, izgi tilegin jetkizdi.

«Mundaı nysandar ádette qalalyq jerlerde boı kóterip, shaharda ómir súretin jastar úshin ǵana qol jetimdi edi. Endi, mine, aýylymyzda da zamanaýı úlgidegi ashyq alań salynyp, aýyl jastary sportpen shuǵyldanýǵa basymdyq berilip otyr. Osy sport alańynda deni saý, rýhy taza, patrıottyq sezimi mol bizdiń aýyl jastary sportpen shuǵyldanyp, bizdiń óńirden de bolashaqta Qazaqstannyń kók baıraǵyn bıikterge kóteretin fýtbolshy sportshylar shyǵa bersin»,- dedi aýyl aqsaqaldary.

Aıta ketý kerek, Báıdibek aýdanynda zamanaýı sport nysandarynyń kóptep ashylýy jastardyń sportqa degen qyzyǵýshylyǵyn arttyra túsedi. Buǵan deıin atalǵan aýdannan jastar arasynda álem chempıonatynyń qola júldegeri Marat Myqtybekov (Azııadaǵy dzıýdo federatsııasynyń prezıdenti), Erkebulan Shynálıev (bokstan 2008 jyly Beıjińde ótken olımpıadanyń qola medal ıegeri), Qasymhan Tólenbaı (Qazaq kúresinen Álem chempıony) syndy sporttaǵy oǵlandar shyqqany belgili.