Báıdibek aýdanynda altyn qursaqty analar marapattaldy

ShAıAN. QazAqparat – Túrkistan oblysy Báıdibek aýdanynda kópbalaly analar qatary kún sanap artyp keledi. Aýdan ákiminiń mindetin ýaqytsha atqarýshy Baǵdatbek Janǵazıev aýdandaǵy altyn qursaqty analardy qabyldap, olarǵa «Altyn alqa» jáne «Kúmis alqa» tósbelgilerin tabys etti, dep habarlaıdy QazAqparat tilshisi.

Bir qolymen besikti, bir qolymen álemdi terbetetin aq jaýlyqty analar el demografııasyna ózderiniń úlesterin qosyp keledi. Osy oraıda Báıdibek aýdanyndaǵy aq jaýlyqty 17 ana Prezıdent Jarlyǵymen marapatqa ıe bolyp, altyn jáne kúmis alqa taǵyndy.

Saltanatty marapataý rásiminde aýdan basshysy kópbalaly analardy quttyqtap, izgi tilegin bildirdi. Elimizdegi ana men balany qorǵaýda memlekettiń jasap otyrǵan qamqorlyǵyna toqtaldy.

«Kópbalaly analar – memlekettiń altyn dińgegi. Elimizde kópbalaly analarǵa kórsetilip jatqan qamqorlyq búginde jyl sanap artyp keledi. Prezıdent ótken jyly áleýmettik járdemaqyny jańa formatta berýdi usynyp, osy jyldyń qańtar aıynan bastap tólenýde. Altyn qursaqty analarǵa degen qamqorlyq áli de jalǵasatyn bolady» ,- dedi Baǵdatbek Janǵazıev.