Baıbektiń ókili málimdeme jasady
Onyń aıtýynsha, qoldanystaǵy zańnamaǵa sáıkes elimizdiń kez kelgen azamaty quqyǵy buzylǵan jaǵdaıda ony úsh túrli aıada qorǵaı alady: qylmystyq, ákimshilik jáne azamattyq. Baýyrjan Baıbek óziniń jeke ustanymyna súıenip, jaýapkerlerdi qylmystyq jáne ákimshilik qýdalaýdan bas tartyp, isti azamattyq qaraýmen shektelýdi jón kórgen. Osylaısha, ol jeke tulǵa retinde talap aryzdy ózin negizsiz jáne jarııa túrde aýyr qylmyspen aıyptap otyrǵan basqa jeke tulǵalarǵa qatysty beredi.
«Qurmetti dostar!
Búgin men Baýyrjan Qydyrǵalıuly Baıbektiń múddesin bildirýshi zańger retinde Janbolat Mamaı men onyń jubaıy Inga Imanbaevaǵa qatysty Almaty qalasy Áýezov aýdany №2 aýdandyq sotyna azamattyq tártippen ar-namysty, abyroı men iskerlik bedeldi qorǵaý týraly talap aryz berdim.
Bul talap aryzdy berýge J.Mamaı men I.Imanbaevanyń bıylǵy 13 sáýirde «Demokratııaly Qazaqstan/Demokratıcheskıı Kazahstan» youtube-arnasynda jáne áleýmettik jelilerde ornalastyrǵan birqatar beınematerıaldary negiz bolyp otyr. Jarııalanǵan materıaldarda jaýapkerler «jýrnalıstik zertteýdi» sebep etip, B.Baıbekti sybaılas jemqorlyqpen jáne qyzmet babyn asyra paıdalandy dep jarııa túrde, úzildi-kesildi jáne dálelsiz aıyptaıdy.
Atalǵan materıaldarǵa jasalǵan taldaý beınerolıkterde jalǵyz aqparat kózi – anonımdik «Uzyn Qulaq» telegram-arnasynyń aqparatyn ǵana negizge alǵan. Bul arna – ósek-aıańdy, dolbardy, tekserilmegen jáne shyndyqqa janaspaıtyn aqparatty taratýmen aınalysatyny málim.
Talapker (B. Baıbek) atyna qarata aıtylǵan aıyptaýlardyń budan bólek shynaıy dáleldemelik bazasy men rastalǵan deregi J.Mamaı men I.Imanbaevanyń beınematerıaldarynda da, tirkelmegen QDP saıtynda da usynylmaǵan.
Bıyl 19 sáýirde, bir aptaǵa jetpeıtin ýaqytta Baýyrjan Baıbek qajetti resmı qujattar men basqa da materıaldardy kórsete otyryp, barlyq aıyptaýlardy jarııa túrde joqqa shyǵardy.
Bul rette, J.Mamaı men I.Imanbaevanyń aıtqan sózderiniń jalǵandyǵyn, jalańsózdiligin jáne arsyzdyǵyn eskere otyryp, B.Baıbek óziniń ar-namysyn, abyroıy men bedelin sot arqyly qorǵaý quqyǵyn paıdalaný jóninde sheshim qabyldady.
Sondyqtan azamattyq zańnama aıasynda biz beınematerıaldar avtorlary aıyptaýlarynyń negizsizdigi men maǵynasyzdyǵyn dáleldeýge nıettenip otyrmyz.
Talapkerdiń el aldynda júrgen tulǵa ekendigin, soǵan oraı bul jaǵdaı men aldaǵy protsestiń úlken rezonans týdyratynyn eskerip, sondaı-aq J.Mamaıdyń ár túrli tásildi qoldaný arqyly qoǵamdyq pikirdi burmalaý yqtımaldyǵyn boldyrmaý úshin, men jurtshylyqty sot protsesiniń barysymen jedel jáne obektıvti túrde habardar etip otyratyn bolamyn. Muny eshqandaı saıasatqa aralastyrmaı, iske qatysy joq baǵalaýlarsyz tek quqyqtyq aıada atqaramyn», - dep jazdy zańger Facebook paraqshasyna.
Baýyrjan Baıbek aqıqatqa kóz jetkizý, J.Mamaı men I.Imanbaeva taratqan málimetterdiń jalǵandyǵyn dáleldeý jáne óziniń bedelin qalpyna keltirý maqsatyn ǵana basshylyqqa ala otyryp, keltirilgen moraldyq zalalǵa materıaldyq ótemaqy óndirip alýdan da bas tartty.