Baıbek velojoldar ne úshin kerek deıtinderge jaýap berdi

ALMATY. QazAqparat - Almatyda BUU damý baǵdarlamasyndaǵy «Turaqty kólik» jobasynyń 6 jylda kórsetken nətıjeleri jarııalandy, dep habarlaıdy QazAqparat tilshisi.

Jıyn barysynda Almaty əkimi Baýyrjan Baıbek Turaqty kólik jobasy aıasynda atqarylǵan jumystar týraly aıtyp berdi.

«Maǵan ókpeleıtinder kóp. Nege velosıpedshilerdiń az ekenin bile tura, sonsha velojol saldyńyzdar deıdi. Men aıtar edim. Aldymen jaǵdaı jasaý kerek. Eger velosıpedpen júrý qaýipsiz bolmasa eshkim otyrmaıdy. Almaty əkimdigi alǵan baǵytynan qaıtpaıdy. Óıtkeni bul nətıjesin kórsetip jatqan joba»-  dedi əkim.

Qala basshysy aqyly turaqtarǵa qatysty narazylyqtan da habardar ekenin aıtty.

«Adamdar aqyly turaqtar ne úshin dep aıtady. Erteńgi kúni týra osy adamdar ekologııa týraly dabyl qaǵa bastaıdy. Jaıaý júrginshi  joldary, velojoldar aqyly turaqtar barlyǵy qalanyń ekologııalyq ahýalyn jeńildetýge baǵyttalǵan», - dedi B.Baıbek.

Onyń aıtýynsha qala əkimdigi Turaqty kólik jobasyn ary qaraı jalǵastyratyn bolady.

Əkim 6 jylda jetken tıimdi jetistikter týraly da tilge tıek etti.

«Almatyda birneshe jylda 10 asa jol aıyryǵy salyndy. Oǵan 3 mlrd teńge jumsaldy. BAKAD joly 40-60 myń kólikti azaıtady. 1-JES gazǵa kóshti. Kelesi jyly «Samuryq Energo» AQ 7 mlrd teńge salady. Osynyń arqasynda aýaǵa taraıtyn zııandy zattardy 9 paıyzǵa azaıtýǵa bolady. BUU Damý baǵdarlamasynyń usynysymen jolaýshylar tasymaly naryǵyn kóleńkeli ekonomıkadan shyǵardyq. 20 tasymaldaýshy múlde tabys joq dep shaǵym aıtatyn. «Ońaı» arqyly naryq kólemi 21 mlrd teńge ekenin anyqtadyq. Bıýdjetke ashyq bıznesten taza salyq túse bastady. Al kəsiporyndardyń ózderi avtobýs satyp alýda»,- dedi əkim.

BUU Damý baǵdarlamasynyń Qazaqstandaǵy turaqty ókiliniń orynbasary Mýnhtýıa Altangerel Almatynyń kólik salasyndaǵy ózgeristerdiń ekologııaǵa yqpaly qandaı bolatynyn aıtty.

«Eger Almatyda Turaqty kólik jobasy osylaı jalǵasa beretin bolsa atmosferaǵa tikeleı  zııandy zattar 500 mln tonnaǵa, janama  zııandy zattar 1 mln tonnaǵa qysqarady»,- dedi Mýnhtýıa Altangerel.

Onyń aıtýynsha, qazir Turaqty kólik jobasy jaıly Shymkent pen Temirtaý qalalary qyzyǵýshylyq bildirip otyr.

Aıta ketý kerek,  Turaqty kólik jobasyn Almaty əkimdigi 2011 jyldan beri júzege asyryp keledi.

Negizgi maqsat qaladaǵy kólikterdiń aýaǵa zııandy zat bólýin shekteý arqyly ekologııalyq ahýalyn jaqsartý bolyp tabylady.

Almaty turaqty kólik jobasy aıasynda qoǵamdyq kólik salasyna qatysty zań jobasy ózgerip BRT jəne LRT jobalary jasaldy, 10 shaqyrymdaı velojol jasaldy. Avtobýstardyń 44 paıyzy gazǵa kóshti.