Baıbek memlekettik basqarýdaǵy áıelder týraly: Halyqtyń eń belsendi, eljandy bóligi

NUR-SULTAN. QazAqparat – «Nur Otan» partııasy janyndaǵy Otbasy, áıelder máseleleri jáne balalardyń quqyqtaryn qorǵaý jónindegi respýblıkalyq qoǵamdyq keńestiń músheleri partııalyq tyńdaýda óńirlerdiń júıeli problemalary anyqtalǵan zertteý nátıjelerin talqylady. Shara barysynda «Nur Otan» partııasy Tóraǵasynyń birinshi orynbasary Baýyrjan Baıbek «Baqytty otbasy» jobasynyń basty mindetteriniń biri – otbasy ınstıtýtyn qoldaý jáne otbasylyq qundylyqtardy nyǵaıtý ekenin atap ótti, dep habarlaıdy QazAqparat.

Sonymen birge Baýyrjan Baıbek áıelderdi memlekettik basqarýǵa tartý qajettigi jaıyn da tilge tıek etti.

«Elbasy-partııamyzdyń Lıderi Nursultan Ábishuly Nazarbaev osy jyldar ishinde áıelderdi qoldaý, áleýmettik lıftiler usyný saıasatyn júrgizdi. Árbir máslıhattyń, Májilistiń kem degende 30% áıelder quraýy qajettigin tapsyrdy. Mysaly, bizdiń aımaqtardaǵy depýtattyq korpýsymyzǵa qaraıtyn bolsaq, ol 3 335 depýtattan turady. ıAǵnı, ár máslıhatta 1 myńǵa jýyq áıel bolady. Bul degenimiz – úlken partııalyq áleýmettik lıft. Bul - halyqtyń eń belsendi, eńbekqor jáne eljandy bóligi bolyp tabylady», - dedi «Nur Otan» partııasy Tóraǵasynyń birinshi orynbasary.

Ol sondaı-aq Otbasy, áıelder máseleleri jáne balalardyń quqyqtaryn qorǵaý jónindegi keńestiń qyzmeti keńeıip, genderlik saıasat pen áıelderdi qoldaý máseleleri de basty nazarda bolatynyn aıtty.

Ómirlik qıyn jaǵdaılarǵa dýshar bolǵan otbasylardy jáne áıelderdi qoldaý, balalardy qorǵaý jónindegi júıeli sharalar respýblıkalyq «Baqytty otbasy» jobasyn júzege asyrýǵa arnalǵan Jol kartasynda kórinis tapty. Keńes músheleri Jol kartasy aıasynda elimizdegi 200 eldimekendi aralap, 1300-den astam bilim berý, áleýmettik qorǵaý jáne densaýlyq saqtaý mekemeleriniń jumysyna monıtorıng jasady.

Monıtorıng qorytyndysy boıynsha, balalardyń quqyqtaryn qorǵaý zańnamasyn jetildirý jóninde naqty usynystar berildi. Aımaqtardaǵy jumys nátıjeleri boıynsha «Nur Otan» partııasynyń Tóraǵasy Nursultan Nazarbaevqa esep berildi. Ortalyq memlekettik jáne jergilikti atqarýshy organdar úshin sharalar qabyldaý jóninde naqty tapsyrmalar berildi.

Otbasy, áıelder máseleleri jáne balalardyń quqyqtaryn qorǵaý jónindegi respýblıkalyq qoǵamdyq keńes «Baqytty otbasy» jobasy aıasynda 2019 jyldyń 7 aqpanynda quryldy. Ulttyq joba QR Tuńǵysh Prezıdenti-partııa Kóshbasshysy Nursultan Nazarbaevtyń tapsyrmasynan bastaý aldy. Jobany iske asyrý aıasynda balalar úıleriniń 1 myńnan astam túlegi turǵyn úımen qamtamasyz etildi, jetim balalarǵa arnalǵan 2 myńǵa jýyq bilim berý-jınaqtaý salymdary ashyldy, qıyn-qystaý jaǵdaıdaǵy 270 myń otbasy zańdyq, psıhologııalyq kómek aldy.