Baıbek Elbasy sheshimi jaıly: Bıliktiń sabaqtastyq saıasatyna tolyqtaı berik ekenin kórsetedi

NUR-SULTAN. QazAqparat - Bıleýshi partııanyń Tóraǵasy laýazymyn Qasym-Jomart Kemelulyna tapsyrý – bul zańdylyq, qazaqstandyq bılik tranzıtine tolyqtaı sáıkes keletin sheshim. «Nur Otan» partııasy Tóraǵasynyń birinshi orynbasary Baýyrjan Baıbek osyndaı pikir bildirdi, dep habarlaıdy QazAqparat atalmysh saıası uıymnyń baspasóz qyzmetine silteme jasap.

«Qasym-Jomart Kemeluly «Nur Otan» qurylǵannan bastap onyń basy-qasynda. Uzaq ýaqyt partııanyń basqarýshy jáne mańyzdy sheshimder qabyldaýshy organy – Saıası Keńes Bıýrosynyń múshesi bolyp tabylady.

2019 jyly Prezıdent laýazymyna kandıdat retinde Qasym-Jomart Kemeluly osy «Nur Otan»-nan usynyldy. Sońǵy parlament saılaýynda partııa Memleket basshysy ózi jarııa etken saılaýaldy baǵdarlamamen aıqyn jeńiske jetti. Sol berilgen ýádelerdi oryndaý – bıleýshi partııanyń qazirgi ýaqyttaǵy basty mindeti.

Elbasy atap ótkendeı, qazir «Nur Otan» qoǵamdy Prezıdentimizdiń Memlekettik baǵdary tóńiregine toptastyrýy qajet.

Bul sheshim el ishindegi jáne syrtyndaǵy barlyq taraptarǵa bıliktiń tutastyǵyn jáne onyń sabaqtastyq saıasatyna tolyqtaı berik ekendigin kórsetedi. Qosarlanǵan bılik týraly aıtylǵan barlyq negizsiz pikirler men orynsyz uıǵarymdardy teriske shyǵaratyn qadam.

Elbasynyń el úshin jáne bıleýshi partııa úshin osyndaı mańyzdy sheshimdi Táýelsizdigimizdiń 30 jyldyǵynda qabyldaýy úlken sımvoldyq mánge ıe dep bilemin», - dep atap ótti Baýyrjan Baıbek.