Baıanaýylda Máshhúr Júsiptiń ózi jazǵan qoljazbalary kórsetildi

PAVLODAR. QazAqparat - Baıanaýyl aýdanyna Ulttyq ǵylym akademııasynyń qorynan oıshyl, fılosof, jazýshy Máshhúr Júsiptiń óz qolynan shyqqan qujattary jetkizildi, dep habarlaıdy pavlodarnews.kz. 

 Almatydan ákelingen jazbalar Máshhúr Júsiptiń mýzeıi men Eskeldi shatqalynda qoıyldy. Jurtshylyq nazaryna sırek kezdesetin 14 qujat kórsetildi. 

«Máshhúr Júsiptiń eńbekteri bar kitaptardyń keıbiri jazýshynyń kózi tiri kezinde jaryq kórgen. Bul kitaptar ótken ǵasyrdyń basy men ortasynda tirkelgen»,- deıdi Ulttyq ǵylym akademııasy ortalyq kitaphanasynyń qyzmetkeri Gúlshat Ábikova.

  Mýzeıde ótken kórmege jazýshynyń urpaqtary da qatysty. Olardyń arasynda óziniń uly babasynyń isin jalǵastyryp júrgender de bar. - Máshhúr Júsip óz jazbalarynda eski arab jazbasyn qoldanǵan, - deıdi jazýshynyń shóberesi Nartaı Júsipov. - Qazaqstanda bul kitaptardy aýdaratyn adamdar óte az. Men on jasymnan osy jazbany meńgere bastaǵanmyn jáne ómir boıy atamyzdyń qoljazbalaryn aýdarýmen aınalysyp kelemin. Onyń keıbireýleri 500-600 betten turady».  

Máshhúr Júsip Kópeıuly 1858 jyly Pavlodar oblysy, Baıanaýyl aýdanynda týǵan. Uly oıshyl, folklortanýshy, etnograf, tarıhshy, fılosof, qazaq mádenıeti men ádebıetiniń belgili tulǵasy. Arab jáne parsy tilderin jetik meńgergenimen qoımaı, kóp tildi bilgen ǵulama. Ol óleń jazýmen qatar, aýyz ádebıeti úlgilerin jınap bastyrýmen de aınalysqan. Shejireler men aıtystardy, kóptegen tarıhı jyrlardy hatqa túsirip, keıingi urpaqqa amanattady. Sonymen birge, ol kúlli ǵumyryn qazaq halqyn saýattandyrýǵa jumsaǵan. 10-15 jasynan bastap-aq óleń jazyp, hat jazarlyq bolǵannan-aq Máshhúr Júsip halyq ádebıetin el aýzynan da, qaǵaz betinen de jınaýmen aınalysady. 

Foto: pavlodarnews.kz