Baıanaýylǵa jyly jaqtan aqqýlar ushyp keldi

<p>PAVLODAR. KAZINFORM - Qos aqqý Birjankólge kelip qonǵan. Óńirde ázirshe ózen-kólderdiń barlyǵy muz qursanyp jatyr.</p>

Baıanaýyl ulttyq tabıǵı parkiniń dırektory Ajdar Júsipov Birjankólge aqqýlar kelgenin habarlady. Qustar suńqyldaq aqqý túrine jatady.

- Qaýyrsyn qanattylardy bizdiń mekemeniń ınspektorlary baıqaǵan. Suńqyldaq aqqýlar elimizde keń taraǵan, kóbine respýblıkamyzdyń Soltústik, Ortalyq jáne Ońtústik-Shyǵys óńirleriniń qalyń qamysty-qoǵaly iri kólderin mekendeıdi. Bizdiń Baıanaýyl jerinde Qyzyl kitapqa engen qıqyldaq aqqý da kezdesedi. Jalpy ulttyq park aýmaǵynda qaýyrsyn qanattylardyń 205 túri bar bolsa, sonyń 9-y Qyzyl kitapqa engen, - deıdi park basshysy.

Qazirgi ýaqytta suńqyldaq aqqýlar Birjankólge taýdan qulap aqqan sýǵa shomylýda. Sýdyń muz ústindegi kólemi kóbeıip keledi. Baıanaýylda kesheli-búgin aýa raıy jylı túsken. Búgin synap baǵanasy +5 gradýsqa deıin kóteriledi dep kútilip otyr. Bul park aýmaǵyndaǵy Sabyndykól, Jasybaı, Toraıǵyr, Birjankól kólderinde qystaı qatqan muzdyń tez arada jipsýine ákeledi.

Al buǵan deıin ulttyq park qyzmetkerleri sý aıdyndaryndaǵy balyqtarǵa ottegin jetkizý úshin muzdy oıyp, aeratsııalyq sharalardy júrgizgen.