Baıanaýyldyq kásipkerler uıaly baılanystyń nasharlyǵyna shaǵymdanyp otyr

<p>PAVLODAR. KAZINFORM - Jasybaı demalys aımaǵyna deıin optıkalyq talshyq tartylǵan. Alaıda demalys úıleriniń oǵan qosylýǵa múmkindigi joq.</p>

Baıanaýyl aýdanynda Óńirlik kásipkerler palatasynyń týrızm jáne qonaq úı bıznesi salalyq keńesiniń otyrysy ótti. Týrıstik fırmalar, demalys úıleri men bılik ókilderi jazǵy maýsymnyń ashylý qarsańynda týyndaǵan máseleler týraly talqylady.

Keńes múshesi Arman Rahmashev Jasybaı týrıstik aımaǵynda elektr qýaty jetispeıtinin habarlady. Osy sebepten munda jaryq jıi óshedi. Taǵy bir másele, demalys úıleriniń ınternetke qoljetimdiligi tómen deńgeıde. Onyń aıtýynsha, optıkalyq talshyq demalys aımaǵyna deıin tartylǵan. Alaıda jergilikti demalys úıleriniń oǵan tehnıkalyq jaǵynan qosylýy múmkin bolmaı tur. Buǵan qosa jergilikti demalys úıleriniń ókilderi uıaly baılanysqa qatysty da problemalar baryn jetkizdi. Baılanys operatorlaryna tólem qabyldaý múmkindigi de shekteýli.

Salalyq keńes otyrysynda kóterilgen bıznes máseleleri oblystyq kásipkerler palatasynyń jáne óńirlik sport basqarmasynyń birlesýimen zerdelenip, sheshimin tappaq.

Eske sala keteıik, Baıanaýylda bir demde 5 myń adam demala alatyn 50-den asa týrıstik nysan bar.