Baıanaýyldaǵy Shalqar kólinde 150 dala qusy belgisiz jaǵdaıda qyrylyp qalǵan

<p>PAVLODAR. KAZINFORM - Ólgen qustardyń barlyǵy - saryalaqaz (qyzyl úırek). Veterınarlar qustardyń qyrylýyna áldebir ýly ósimdikter sebep bolýy múmkin degen boljam jasap otyr.</p>

Baıanaýyldyń Kúrkeli aýyldyq okrýgi aýmaǵyndaǵy Shalqar kólinde úırek tuqymdas qus – saryalaqazdyń jappaı qyrylýy tirkeldi. Jergilikti azamattar túsirgen beınejazbadan baıqaǵanymyzdaı, qaýyrsyn qanattylar kól aınala jappaı jýsap jatyr.

Atalǵan másele boıynsha óńirlik veterınarlyq basqarmasynyń mamandary oqıǵa ornyna jedel baryp, kól mańaıynda ólip jatqan qustardyń ushalaryn jınap, órtegen.

- Ólgen qustardyń barlyǵy - úırek tuqymdastarǵa jatatyn saryalaqaz. Ári 90 paıyzy byltyrǵy balapandar ekeni anyqtalyp otyr. Qustardan materıal alynyp, Astanadaǵy ulttyq zerthanaǵa jiberdik, nátıjesi apta sońyna deıin belgili bolyp qalýy kerek. Onda qus indetiniń 7-8 túri jáne ýlaný boıynsha tekseriledi. Kól mańaıynan bizdiń qyzmetkerlerimiz jalpy sany 150-deı qustyń óleksesin tapty. Ózge qustar men jan-janýarǵa zııany tımeýi úshin barlyǵyn jınap, órtep jiberdik. Qazir Jumat Shanın aýyly men ózge de jaqyn eldi mekender aınalasyndaǵy kólderge monıtorıng júrgizip jatyrmyz. Biraq ózge kólderde mundaı jaǵdaı tirkelgen joq, - deıdi Pavlodar oblysy veterınarııa basqarmasy basshysynyń mindetin atqarýshy Asyltas Tileýbaev.

Basqarma ókiliniń boljamynsha, qustar áldebir ýly shópti jep, sodan qyrylýy múmkin. Sebebi kól sýynan ýlaný múmkin emes. Onda saryalaqazdan ózge basqa da túrli qustar mekendeıdi. Olardyń barlyǵy din aman.

«Al qus indeti tarady desek, onda kóldegi barlyq qustar shaldyǵar edi. Sondyqtan qustardyń shópten ýlanýy ábden múmkin. Bıyl barlyq jerde sııaqty Baıanaýyl óńirinde de ylǵal mol bolyp, aýmaqta ósetin shóptiń barlyq túri shyǵyp ketken. Olardyń arasynda túrli ýly ósimdikter kezdesedi. Keıde ony jegen úıdegi jas tólder, qozy-laq, buzaýdyń ólip qalatyn jaǵdaılary tirkeledi», - deıdi Asyltas Tileýbaev.

Jergilikti turǵyndardyń aıtýynsha, Shalqar kezinde eki kólden turǵan. Biriniń sýy – aşy, ekinshisiniń tuşy bolǵan eken. Sońǵy jyldary sý aıdyndary kemerinen asyp, bir-birimen qosylyp ketken. Qazirdiń ózinde kóldiń bir bóliginde sý aşy, ekinshi jaǵynda tuşy ekeni baıqalady. Mamandar qustyń ólimine bul eshqandaı sebep emes deıdi. Sebebi kez kelgen qus sýdyń aşy-tuşylyǵyn tanı alady.

Eske sala keteıik, Pavlodarlyq kásiporyn ekologııalyq talaptardy buzǵany úshin iri kólemde aıyppul tóledi.