Baıanaýyldaǵy órt: Jeltaý aýylynyń turǵyndary úılerine tolyqtaı oraldy
Bul týraly QR Tótenshe jaǵdaılar mınıstrliginiń baspasóz qyzmeti habarlady.
Baspasóz qyzmetiniń málimetterine qaraǵanda, Qaraǵandy oblysynyń aýmaǵyndaǵy órt oqshaýlandy, órtengen aýmaqtyń kólemi anyqtalýda.
«Qatty ekpindi jel, relefti taýly, batpaqty jerler jáne órt oshaqtaryna kiretin joldardyń bolmaýy órtti sóndirý jumystaryn qıyndatty. Qazirgi ýaqytta Qaraǵandy oblysynyń aýmaǵyndaǵy órt oshaqtaryn joıý jumystary jerústi jáne áýe kóligimen júrgizilip jatyr. Qaraǵandy oblysynyń Aıyr jáne Atantaı eldi mekenderi aýdanynda 2 ýchaske anyqtaldy. Mınıstrliktiń komandalyq ortalyǵy men oblystardyń TJD jedel shtabtary táýlik boıy jumys istep tur»,-dep málimdedi mınıstrlikten.
Qazirgi ýaqytta órt sóndirý jumystaryna 557 adam men 88 tehnıka, 6 ushqyshsyz ushatyn apparat, QR TJM jáne ІІM UU 4 áýe kemesi jumyldyrylǵan.
Órtti sóndirýge Qaraǵandy, Aqmola, Abaı oblystarynyń, Astana qalasynyń qutqarý toptary, TJM 52859, 68303 áskerı bólimderiniń jáne jergilikti atqarýshy organdar qatysýda.
Áýe kemeleri órt oshaqtaryna barlyǵy 87 ret, jalpy kólemi 102 tonnadan astam sý tókti. Sonymen qatar aerovızýaldy barlaý júrgizildi. Ushý nátıjeleri boıynsha jaǵdaı turaqty.
Eske sala keteıik, 6 qazan kúni Baıanaýylda dalalyq alqap órtenip, bir aýyldyń turǵyndary qaýipsiz aýmaqqa kóshirildi.
Al 7 qazan kúni túske taman Pavlodar oblysynyń ákimi Baıanaýyldaǵy órttiń oqshaýlanǵanyn habarlady.
Keshegi derek boıynsha Baıanaýylda órt shalǵan jerlerdiń aýmaǵy 10 myń gektarǵa jetken.
Tótenshe jaǵdaı mınıstrligi Pavlodar oblysyndaǵy tabıǵı órttiń sóndirilgenin habarlady.