Baıanaýylda jer órtenip, bir aýyldyń turǵyndary qaýipsiz aýmaqqa kóshirildi

<p>PAVLODAR. KAZINFORM - Órt Qaraǵandynyń Pavlodar oblysymen shektesetin aýmaǵynan kelgen. Qatty jeldiń saldarynan tilsiz jaý Baıanaýyl aýdanynyń bir aýyldyq aýmaǵyna ótip ketken. Qazirgi ýaqytta 18 adam qaýipsiz jerge evakýatsııalandy.</p>

Belgili bolǵandaı, Qaraǵandy jaqtan kelgen órt Baıanaýyl aýdany Kúrkeli aýyldyq okrýgine qaraıtyn Jeltaý bólimshesi men Báıneke qystaǵynyń aýmaǵyna kirgen. Qatty jel órtti aýyzdyqtaý jumystaryn qıyndatý ústinde.

- 6 qazanda Qaraǵandy oblysy Qaraqaraly aýdany Qoıandy aýylynyń mańynda qurǵaq shóptiń janýy oryn aldy. Órt ornyna orman sharýashylyǵynyń, TJD kúshteri men quraldary jáne erikti órtke qarsy quralymdar dereý jiberildi. Aldyn ala 40 gektar alqapta janý baıqaldy. Órtti sóndirý barysynda óńirlik TJD eki qyzmetkeri jáne erikti órtke qarsy quralymnyń bir qyzmetkeri kúıik aldy. Olar aýdandyq aýrýhanaǵa jetkizilip, dárigerler alǵashqy medıtsınalyq kómek kórsetti. Keıin «Qazavıaqutqarý» AQ tikushaǵynda órtten zardap shekken taǵy bir turǵyndy Qaraǵandy qalasynyń aýrýhanasyna jetkizdi. Aldyn ala málimetter boıynsha, ol jeńil kúıik alǵan, - dep habarlady QR Tótenshe jaǵdaılar mınıstrliginiń baspasóz qyzmeti.

Kúndiz dala órti Pavlodar oblysynyń shekarasynan «Baıanaýyl memlekettik ulttyq tabıǵı parkiniń» ormansyz aýmaǵyna kóshken. Órt ornyna «Qazavıaqutqarý» tikushaqtary bardy. Tikushaq sýdy Shalqarkól kólinen qarmap alyp, saǵat 17.00-degi jaǵdaı boıynsha órt oshaqtaryna 6 ret jalpy kólemi 18 tonna sý tógilgen.

Sondaı-aq aerovızýaldy barlaý barysynda Jeltaý aýylynyń turǵyndaryn aldyn ala evakýatsııalaý týraly sheshim qabyldanǵan. Qaýipsiz jerge 18 adam (8-i bala) evakýatsııalandy.

«QR Tótenshe jaǵdaılar mınıstrligi Komandalyq ortalyǵynda shtab jumys isteýde. TJ vıtse-mınıstr Eran Nurpeıisov órt ornynda. Qaraǵandy oblysynyń ákimi de oqıǵa ornyna bardy. Qutqarýshylar toby qosymsha kúshter men quraldarmen tolyqtyryldy. Órt ornynda Qaraǵandy jáne Pavlodar oblystarynan TJD, JAO, ETRM kúshteri jumyldyryldy: jeke quramnan 183 adam, 56 birlik tehnıka jáne 4 tikushaq. Órttiń aldyn ala aýdany 3000 gektardan asty», - dep málimdedi mınıstrlikten.

Qatty ekpindi jel, taýly jerler jáne órt oshaqtaryna kirme joldardyń bolmaýy órtti sóndirý jumystaryn qıyndatýda.

«Jergilikti órtke qarsy qyzmet pen Baıanaýyl ulttyq parkiniń qyzmetkerleri jáne aýyl adamdary tilsiz jaýmen kúresip jatyr. Jeltaý aýyly men Báıneke qystaǵynan jalpy sany 14 adam (9 bala, 5 áıel adam) Jumat Shanın aýylyna kóshirilip, týystarynyń úıine ornalastyryldy. Qazirgi ýaqytta Pavlodar qalasynan qosymsha 3 órt sóndirý mashınasy keldi», - dep málimdedi ákimdikten.

Aýdan ákiminiń orynbasary Qınaıat Talıpov qazir órt sóndirý jumystaryna qajetti janar-jaǵarmaı bólinip, jan-jaqtan tehnıkalar kelip jatqanyn jetkizdi. Al Qaratomar aýyldyq okrýginiń órt sóndirýshileri dala órtin óz aýmaqtaryna kirgizbeı, ýaqtyly sóndirip alǵan.

Atap ótý kerek, órt bolyp jatqan jerlerdiń biraz bóligi Baıanaýyl ulttyq parkiniń aýmaǵyna qaraıdy. Biraq Ulttyq park basshylyǵy naqty aqaparat usynbaı otyr.