Baıanaýylda qyrylǵan qustardan juqpaly indet anyqtalǵan joq – veterınarııa mamandary

<p>PAVLODAR. KAZINFORM &ndash; Baıanaýyldyń Qosshalqar kólinde belgisiz sebeppen qynadaı qyrylǵan dala qustary eshqandaı juqpaly dertke shaldyqpaǵan. Qus patologııasyn zerttegen &laquo;Veterınarııa jónindegi ulttyq referenttik ortalyq&raquo; RMK qyzmetkerleri osyndaı sheshimge keldi. Bul týraly óńirlik veterınarııa basqarmasynan habarlady.</p>

«Bıylǵy 6 tamyzda Baıanaýyl aýdany, Kúrkeli aýyldyq okrýgi, Qosshalqar kóliniń aýmaǵynda sýda júzetin jabaıy qustardyń ólimi tirkeldi. Veterınarııalyq mamandar «Baıanaýyl memlekettik ulttyq tabıǵı parki» RMM-men birlesip epızootııalyq tekserý júrgizý úshin sol jerge bardy. QR Aýyl sharýashylyǵy mınıstrligi veterınarııalyq baqylaý jáne qadaǵalaý komıtetiniń «Veterınarııa jónindegi ulttyq referenttik ortalyq» RMK qyzmetkerleri 5 qustyń patologııalyq materıalyn iriktep, «Qustardyń joǵary patogendi tumaýy», «Nıýkasl aýrýy» aýrýlary boıynshe zerthanalyq tekserýden ótkizdi. 2024 jylǵy 23 tamyzdaǵy synaq hattamasyna sáıkes, joǵaryda atalǵan aýrýlar dala qustarynyń óleksesinen anyqtalmady», - dep jazylǵan basqarma taratqan aqparatta. 

Sonymen qatar veterınarııalyq mamandar jaqyn mańdaǵy sý qoımalaryna turaqty monıtorıng júrgizip otyrǵany aıtylǵan. Olarda jabaıy qustardyń ólý faktileri tirkelmegen. Josparly tártipte Kúrkeli aýyldyq okrýgi turǵyndarynyń jeke aýlalarynda ustalatyn 1 395 bas úı qusyna Nıýkasl aýrýyna qarsy vaktsınalaý júrgizildi. 

Jabaıy qus óliminiń sebepterin anyqtaý maqsatynda Pavlodar oblystyq orman sharýashylyǵy jáne janýarlar dúnıesi aýmaqtyq ınspektsııasynyń mamandary odan ári zertteý úshin Qosshalqar kóliniń aýmaǵynda topyraq, sý jáne ósimdik jamylǵysynyń synamalaryn alǵan. 

Pavlodar oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Rýslan Tólepbaev qustardyń qyrylýyna jaqyn mańdaǵy egistikke sebilgen pestıtsıdter sebep bolýy múmkin degen nusqany alǵa tartady. 

– Qosshalqar kóline 17 shaqyrymdaı jerde, Qaraǵandy oblysy aýmaǵynda áldebir sharýashylyq egin egip otyr. Olar eginderin pestıtsıdtermen óńdegen. Jergilikti jurttyń aıtýynsha, qustar sol baǵytqa jıi ushqan. Qustardyń pestıtsıdterden ýlanǵanyn zerthanalyq qosymsha zertteýler anyqtaıdy. Buǵan qosa sýdyń quramy ózgerýinen qyrylýy múmkin degen de boljam bar. Qosshalqar kóliniń sýynan synama alyndy. Bizdiń oblysta qus ólekseleri men sýdyń quramyn arnaıy zertteıtin zerthanalar joq. Sondyqtan nátıjelerin kútýge týra keledi, - deıdi R. Tólepbaev. 

Eske sala keteıik, Baıanaýyldaǵy Shalqar kólinde 150 dala qusy belgisiz jaǵdaıda qyrylyp qalǵan edi. 

Qustardyń óleksesin jınaýǵa qatysqan aýyl adamdary Baıanaýylda qyrylǵan qustyń sany myńnan asyp ketýi múmkin ekenin aıtqan bolatyn. Alaıda veterınarııa mamandary bul týraly naqty aqparat bermeı otyr.