Baıanaýylda demalyp júrgen týrıster sırek ósimdikterdi julǵan

<p>PAVLODAR. KAZINFORM — Taýly ólkege tynystap kelgender jartastar mańynda sırek kezdesetin qyryqqulaq (paportnık) ósimdigin julyp alǵan. Ulttyq tabıǵı parktiń qyzmetkerleri polıtseılermen birlesip, demalýshylar arasynda profılaktıkalyq áńgime júrgizdi.</p>

Bul týraly ulttyq parktiń mamandary habarlady.

Baıanaýyl memlekettik ulttyq tabıǵı parkiniń basshylyǵy týrısterden sırek kezdesetin ósimdikterge tıispeýdi surap otyr.

Taý aralap, qyzyq izdegender qyryqqulaq ósimdigin julyp tastaǵany týraly fakti tirkelgen.

Park mamandary aýdandyq polıtsııa bóliminiń qyzmetkerlerimen birlesip, demalýshylar arasynda túsindirý jumystaryn júrgizdi.

Buǵan demalýshylardyń ishinde sırek kezdesetin ósimdikti julyp alǵan jaǵdaı sebep bolǵan.

QR Ákimshilik quqyq buzýshylyq týraly kodekstiń 378 babynda: «Ósimdikter ósetin jerler men janýarlardyń mekendeý ortasyn qorǵaý qaǵıdalaryn, janýarlardyń kóbeıý jaǵdaılaryn, óris aýdarý joldary men shoǵyrlaný oryndaryn, zoologııalyq jáne botanıkalyq kollektsııalardy jasaý, saqtaý, esepke alý men paıdalaný qaǵıdalaryn buzý, sol sııaqty janýarlar túrlerin zańsyz qonys aýdartý, ıntrodýktsııalaý, reıntrodýktsııalaý jáne býdandastyrý –eskertý jasaýǵa nemese jeke tulǵalarǵa — segiz, laýazymdy adamdarǵa, shaǵyn kásipkerlik sýbektilerine nemese kommertsııalyq emes uıymdarǵa — on tórt, orta kásipkerlik sýbektilerine — jıyrma, iri kásipkerlik sýbektilerine alpys aılyq eseptik kórsetkish mólsherinde aıyppul salýǵa ákep soǵady», -dep kórsetilgen.

Tártip saqshylary demalys aımaǵyndaǵy «Berezka» demalys úıiniń basshylyǵyna atalǵan oqıǵa boıynsha eskertý jasady.

Eger demalýshylar arasynda óreskel jaǵdaı taǵy qaıtalanatyn bolsa, kásipkerlik sýbektisine aıyppul salynady.

Eske sala keteıik, Baıanaýylda bir demde 5 myń adam demala alatyn 50-den asa týrıstik nysan bar.