Baıanaýyl kólderin baldyrdan tazartý úshin 50 myńǵa jýyq aq amýr jiberiledi

<p>PAVLODAR. KAZINFORM - Pavlodar oblysyndaǵy Ertis ózeni men Baıanaýyldaǵy kólderdi balyqtandyrý úshin bıyl 100 mln teńge qarastyrylyp otyr. Onyń aıasynda Sabyndykól men Toraıǵyr kólderine 48,6 myń aq amýr balyǵy jiberiledi dep josparlanǵan.</p>

Pavlodar oblysynda Memleket basshysy Qasym-Jomart Toqaevtyń bıoártúrlilik pen balyq resýrstaryn qorǵaý jónindegi sharalardy kúsheıtý qajettigine qatysty aıtylǵan tapsyrmasyn oryndaý maqsatynda keshendi baǵdarlama belsendi túrde iske asyrylyp jatyr. Sońǵy jyldary balyq aýlaý kólemi edáýir ósken.

- 2021 jyldan bastap óńirdiń sý aıdyndaryna 22,6 myń balyq otyrǵyzý materıaldary shyǵaryldy. 2024 jylǵa arnalǵan josparlar baǵdarlamanyń aıtarlyqtaı keńeıýine áser etpekshi. Sonyń ishinde Baıanaýyl aýdanyndaǵy kólder men Ertis ózenine quıatyn ózenderdi 100 mln teńgege balyqtandyrý josparlanǵan. Bul is-sharalar aıasynda tuqy tuqymdasynyń 85 myńnan astam balyǵy shyǵarylady. Máselen Toraıǵyr kóline 10 myń aq amýr, Sabyndykólge 38,6 myń aq amýr, sondaı-aq Talınka sý qoımasyna 2,3 myń tuqy jiberiledi,-dep habarlady óńirlik jer qoınaýyn paıdalaný, qorshaǵan orta jáne sý resýrstary basqarmasynan.

Bul sharalar balyq resýrstaryn qalpyna keltirýge ǵana emes, sonymen qatar sý nysandarynyń ekologııalyq jaǵdaıyn jaqsartýǵa baǵyttalǵan. Aq amýr tabıǵı melıorator retinde sý aıdyndaryndaǵy baldyr men qamysty azaıtýǵa kómektesedi. Ári sýdyń sapasyn jaqsartýǵa, jergilikti ekojúıelerdi saqtaýǵa sep bolady.

Eske sala keteıik, Pavlodar polıtseıleri zańsyz aýlanǵan 15 tonnadan astam balyqty tárkiledi.