Baıan Maqsatqyzy óz kitabynyń satylymynan túsken qarajatqa jańa joba ashpaq
Búgin Almatyda «Baıan. Ózim jaıly ǵana emes» kitabynyń tanystyrylymy ótedi. Jaqynda ǵana prodıýser bir jyl boıy suhbat bermeıtinin habarlaǵan edi. Sondyqtan, jańa kitaptyń jaryq kórýine arnalǵan baspasóz máslıhatynda jýrnalıster ózderin qyzyqtyryp júrgen barlyq saýaldy Baıan Maqsatqyzy uzaq «demalysqa» ketpeı turǵanda qoıyp aldy.
«Men jeke suraqtarǵa jaýap bermeımin. Óz kitabymda múmkindiginshe bárin ashyq aıttym. Kez kelgen adekvatty adam kitabymdy oqyǵan soń, maǵan suraq qoımaıtyn bolady. Shynymdy aıtsam, baıaǵyda zeınetke shyqqanda ǵana kitap jazamyn dep oılaýshy edim. Qartaıyp, qolym bosaǵanda, estelikter jazamyn dep oılaǵanmyn. Biraq, meniń ómirimniń astan-kesteńi shyqty... Sol sebepti, kitap ta erterek jaryq kórdi. Meniń ómirimde aýyr kezeń boldy», - dep aqtaryldy Baıan.
Jeke kitabynan bólek, Baıan Maqsatqyzy óziniń jańa jobasy - áıelderdiń quqyǵyn qorǵaý qoǵamy jaıynda aıtty. Kitaptyń satylymynan túsken tabystyń basym bóligi atalǵan jobanyń ashylýyna jumsalady.
«Bári satylymnyń qalaı júretinine baılanysty. Áıelderdiń quqyǵyn qorǵaý uıymyn ashý úshin satylymnan kóbirek aqsha túskenin qalaımyn. Onda turmystaǵy zorlyq-zombylyq qana emes, balalardy qorǵaý máselesine de nazar aýdarylady. Eger ana baqytsyz bolsa, bala da baqytsyz. Eger ortalyq bıyl ashylsa, «demalysymdy» úzýge týra keledi. Nemese tek qana resmı málimdemeler ǵana jasaımyn», - dep tolyqtyrdy Baıan.
Tanymal prodıýser jeke ómirine qatysty suraqtardan basyn alyp qashqanymen, otbasy týraly suraqqa jaýap berýge týra keldi.
«Meniń eki qyzym eresek adamdar. Kitap jazǵanda olardan ne jazyp, ne jazbaý kerektigi týraly ruqsat suraǵan joqpyn. Biraq, belgili bir qaǵıdalardy ustanǵanym ras. Kishi qyzym kitapty oqyp, qatty jylaǵanyn aıtty. Al úlkenimmen bul týraly sóılesip úlgermedim, biraq ol óziniń retsenzııasyn daıyndap qoıdy. Onyń kitap týraly pikirin búgin bilemiz», - dedi prodıýser.
Eske sala ketsek, ótken jyldyń maýsym aıynda Baıan Maqsatqyzyn burynǵy kúıeýi soqqyǵa jyqqan bolatyn. Densaýlyǵy qalpyna kelgen soń, Baıan turmysqa ekinshi ret shyqqaly jatqanyn jarııalady.