Baıan da, balalary da Baqytbek Esentaevtyń sotyna qatyspady

TALDYQORǴAN. QazAqparat - Búgin Baqytbek Esentaevqa sot úkim shyǵaryp 9 jylǵa bas bostandyǵynan aıyrý jazasyn taǵaıyndady. Biraq, sońǵy sot otyrysyna Baqytbek Esentaevtyń qyzdary da, Baıan Maqsatqyzy da kelmedi, dep habarlaıdy QazAqparat tilshisi.

Qazir qorǵaýshylar Baqytbek Esentaevqa taǵylǵan aıyppen kelispeımiz dep otyr. Endi olar appelıatsııalyq shaǵym túsirmek. Baqytbek Esentaev adam óltirýge oqtalý baby boıynsha kináli dep tanylǵan. Alaıda, taǵaıyndalǵan jazamen onyń qorǵaýshylary túbegeıli kelispeıdi.

«Baqytbek eger óltiremin dese, onda ýaqyt ta boldy. Biraq ol óltirmedi. Bul aıyp durys emes. Sondyqtan biz isti bulaı qaldyrmaımyz. Qaıta shaǵymdanamyz», - dedi Baqytbektiń  qorǵaýshysy Bekbolat Jekseıitov.

Baıan Esentaevanyń da qorǵaýshysy Marat Asqarbekov sot tym qatal jaza taǵaıyndady, 9 jyl degen óte kóp dep otyr. Jáne óziniń atalǵan sottan keıin kóńil-kúıi joq ekenin jýrnalısterge jetkizdi.

Aıta ketý kerek, Baqytbek Esentaevtyń soty 18  qazanda bastaldy.  Іs Almaty oblysynyń qylmystyq ister jónindegi mamandandyrylǵan aýdanaralyq sotynda qaraldy.

Esterińizge sala keteıik, Baıan Maqsatqyzy bıyl 10 maýsymda birneshe jerden pyshaqtalyp, aýyr jaraqatpen Talǵar aýdanyndaǵy aýrýhanaǵa túsken bolatyn. Belgili prodıýser, eki balanyń anasy Baıan Maqsatqyzyn óziniń kúıeýi óltirmek boldy degen kúdikpen Baqytbek Esentaev ustalyp, qamaýǵa alyndy.