Baıan Ahataı: Qyz alyp qashý — tozyǵy jetken dástúr

<p>Qazaqstan halqy Assambleıasy &laquo;Analar&raquo; keńesi tóraǵasynyń orynbasary Baıan Ahataı qyz alyp qashý dástúrine qatysty pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Dástúrdiń ozyǵy bar, tozyǵy bar. Bir kezderi qyz alyp qashý qabyldaýǵa bolatyn dástúr bolǵan shyǵar. Qazir, bizdiń zamanymyzda „bul tozǵan dástúr“ dep aıtar edim. Sebebi nekege saýatty, sanaly túrde kelý kerek. Mektepte de balalardy, jasóspirimderdi nekege daıyndaý máselesi bolýy qajet. Búgingi kúni ajyrasýdan da, erte júktilikten de batystan ozyp ketken jaǵdaımyz bar. Munyń saldarymen kúrese bermeı, sebebin de anyqtaý qajet. Árıne, saldarymen de kúresken jón. Biraq sebebine úńilip, kelesi býynda nekege jaýapty qaraýǵa úıretýimiz qajet», — dedi ol agenttik tilshisine bergen suhbatynda.

Onyń atap ótýinshe, eger materıaldyq jaǵdaıǵa baılanysty eki jastyń ata-analary ortaq uıǵarymǵa kelse, ondaı qyz alyp qashýǵa bolady.

Ókinishke qaraı ońtústik óńirde kelisimsiz qyz alyp qashý áli de barshylyq. Qyzdar ómirinde múldem kórmegen adamǵa jar bolyp jatqan jaǵdaılar bar.

«Qyz alyp qashý kútpegen neke bolǵannan keıin onyń saldary da ártúrli bolyp jatady. Qazir burynǵydaı kónip otyra beretin qyzdar joq», — dedi Baıan Ahataı.

Aıta keteıik, elordada Ortalyq Azııa óńirinde áıelder men qyzdarǵa qatysty jasalatyn zorlyq-zombylyqtyń aldyn alýǵa er-azamattary jumyldyrý salasyndaǵy ulttyq áleýetti nyǵaıtýǵa baǵyttalǵan óńirlik semınar-trenıng ótti.