Baýyrjan Serikbaev: Barlyq partııaǵa teń múmkindik jasalǵan

NUR-SULTAN. QazAqparat – Órkenıetti elderde saılaý óte salysymen aldaǵy bes jyldan keıin bolatyn saılaýǵa daıyndala bastaıdy. Bizdiń eldiń saıası júıesindegi partııalar da osyndaı júıede jumys isteýge úırenýi kerek. Bul týraly elordada «Saılaý – 2021: úgit-nasıhat trendteri» taqyrybynda ótken sarapshylar talqylaýynda saıasattanýshy Baýyrjan Serikbaev aıtty.

«Úgit-nasıhat jumystary ótken jyldyń 10 jeltoqsanynan bastaldy. Bul saılaýdyń bir ereksheligi bar: saılaý óz ýaqytynda ótip jatyr. Osy ýaqytqa deıin Prezıdent saılaýy da, Parlament saılaýy da ýaqytynan buryn ótetin jáne «Daıyndyqsyz qaldyq», «Úlgermedik» degen áńgime kóp aıtylatyn. Bul jolǵy saılaýda eshqandaı partııa saılaý ýaqytynan buryn ótkeni, úlgere almaı qalǵany týraly áńgime aıta almaıdy. Barlyq partııaǵa teń múmkindik jasalǵan», - deıdi saıasattanýshy. Eýrazııalyq ıntegratsııa ınstıtýtynyń sarapshysy Baýyrjan Serikbaev.

Ol osy jolǵy úgit-nasıhat jumystaryn eki topqa bólip qarastyrýǵa bolatynyn aıtty.

«Birinshisi, partııa músheleri, kandıdattary «esikten esikke», «aýyldan aýylǵa» degen qaǵıdany ustanyp, árbir úıge ózi tikeleı baryp úgit-nasıhat júrgizdi. Ekinshi, barlyq partııa áleýmettik jelilerde óte belsindi bolǵanyn bárimiz kórip otyrmyz. Ár partııa Instagram, Facebook paraqshalarynda jazba jarııalap, beınerolıkter salý arqyly úgit-nasıhat jumystaryn júrgizdi.

Jalpy alǵanda úgit-nasıhat jumystarynda biz eshqandaı shekteý baıqaǵan joqpyz. QR Zańdaryna sáıkes ár partııa óziniń múmkindigiine qaraı qozǵalyp, halyqpen tyǵyz jumys istep jatyr dep aıtýǵa bolady», - deıdi sarapshy.

Baýyrjan Serikbaev Qazaqstannyń saıası júıesindegi partııalar órkenıetti elderdiń deńgeıine kóterilýi kerek ekenin aıtty.