Baýyrjan Momyshuly batyrlyqtyń erliktiń, qaısarlyqtyń, qolbasshylyq kemeńgerliktiń úlgisi retinde tanyldy - Mádenıet mınıstri

ASTANA. Mamyrdyń 5-i. QazAqparat /Marlan Jıembaı/ - Baýyrjan Momyshuly batyrlyqtyń, erliktiń, qaısarlyqtyń, qolbasshylyq kemeńgerliktiń úlgisi retinde tanyldy. Bul pikirdi búgin elordadaǵy QR Prezıdenttiń mádenıet ortalyǵynda ótken Keńes Odaǵynyń Batyry, qazaq halqynyń ór tulǵasy, kórnekti jazýshy Baýyrjan Momyshulynyń týylǵanyna 100 jyl tolýyna arnalǵan «Qaharman» atty ádebı-shyǵarmashylyq kesh barysynda Mádenıet mınıstri Muhtar Qul-Muhammed bildirdi.

Baýyrjan Momyshulynyń ómiri men shyǵarmashylyǵy týraly derekti fılmniń kórsetilimimen bastalǵan keshte sahna tórine kóterilgen Mádenıet mınıstri «Eldiń atyn er shyǵarady» degen qanatty sóz bar halqymyzda. Eger osy sóz bir adamǵa qatysty bolsa, ol Baýyrjan atamyzǵa qatysty bolar dep oılaımyn. Óıtkeni, Uly Otan soǵysynyń qarsańynda qazaq degen halyq basynan bir emes eki birdeı qasiretti ótkizip, teń jarymynan aıyrylyp, qansyrap qalǵan halyq bolatyn. 32-shi jyldyń asharshylyǵy, 37-shi jyldyń qýǵyn-súrgini ulttyń qaımaǵyn súzip alyp ketken edi. Minekı, osyndaı kezde qazaq degen ulttyń bas kóterer azamattarynyń ózi de saýsaqpen ǵana sanarlyq dárejede qalǵan. Sol kezde, Uly Otan soǵysynyń alǵashqy kúnderinen jaı oǵyndaı jarqyldap, soǵystyń qan maıdanynda, tek Máskeý túbindegi arpalystyń ózinde 21 ret shaıqasqa shyǵyp, 5 ret jaýdyń qorshaýyn buzyp shyqqan jas arystan ol - Baýyrjan Momyshuly bolatyn. B.Momyshuly soǵystyń alǵashqy kúnderinen-aq qazaq degen qaharman halyqtyń atyn shyǵardy. Soǵystyń ortasyna qaraı Baýyrjan atyn búkil maıdan dalasy, bir jaq sheti qıyr shyǵystaǵy Kvantýn armııasy soǵysyp jatqan maıdan dalasynan, ekinshi sheti Eýropanyń tórine deıin alyp jatqan ulan keńistikte batyr esimi shyrqap kókke shyǵyp turdy. Ol batyrlyqtyń erliktiń, qaısarlyqtyń, qolbasshylyq kemeńgerliktiń úlgisi retinde tanyldy», dedi óz sózinde.

QR Prezıdenttik mádenıet ortalyǵynyń dırektory Myrzataı Joldasbekovtiń júrgizýimen ótken keshtiń qurmetti qonaǵy retinde Baýyrjan Momyshulynyń kelini, jazýshy Zeınep Ahmetova qatysty. Mádenı is-shara barysynda QR halyq ártisi Nurjamal Úsenbaeva, QR eńbek sińirgen ártisi Aıgúl Úlkenbaeva, sondaı-aq Bolat Ábdilmanov, Janat Shybyqbaev, Erkin Shúkimanov sııaqty qazaq óneriniń sheberleri batyr babamyzdyń halyqqa keń taraǵan mol murasynan úzindiler oryndady. Sondaı-aq ádebı-shyǵarmashylyq kesh barysynda B.Momyshulynyń ómiri men shyǵarmashylyǵy jóninde syr shertetin derekti jáne kórkem fılmderden úzindiler, teatrlandyrylǵan qoıylymdar, soǵys jyldarynyń ánderi usynyldy.

Mádenı sharany QR Mádenıet mınıstrligi, «Qazaq áýenderi» AQ uıymdastyrdy.