Baýyrjan Baıbek UOS ardagerin mereıli 100 jasqa tolýymen quttyqtady

ALMATY. QazAqparat - Memleket basshysynyń tapsyrýy boıynsha Almaty ákimi Baýyrjan Baıbek Uly Otan soǵysynyń ardageri Ádish Ábdiraıymovty mereıli 100 jasqa tolýymen quttyqtady, dep habarlaıdy QazAqparat tilshisi.

Ádish atanyń ózi aıtqandaı, ol 1918 jyly 9 mamyrda týǵan. 1938 jyly Harkov farmatsevtıka ınstıtýtyna túsken. Al 1941 jyly ońtústik-shyǵys maıdany 173-shi atqyshtar dıvızııasynyń jaýyngeri atanady.

Qarııa nemistiń Noıengamme kontslagerindegi qıynshylyqty bastan ótkergen. Ádish Ábdiraıymov úıine tek 1947 jyly oralady.

1952 jyly Tashkenttegi Orta Azııa memlekettik ýnıversıtetin «bıolog» mamandyǵy boıynsha bitirip shyǵady. Oqýdan soń tájirıbe stansysynyń zerthana meńgerýshisi bolady jáne Ońtústik Qazaqstan oblysyndaǵy qazirgi Maqtaral aýdanynda maqtanyń jańa sorttaryn shyǵarýmen aınalysady.

Búginde Ádish ata tórt baladan úsh nemere, bir shóbere súıip otyr.
 

«Men barlyqtaryńyzdy búgingi erekshe merekemen quttyqtaımyn. Jer betindegi barlyq adamdarǵa densaýlyq, baqyt jáne ózara túsinistik tileımin. Eń bastysy - aspanymyz ashyq, adamdar baqytty ǵumyr keshýde. Qazirgi kezde Elbasymen birge bizdiń halqymyz ózara dostyq pen kelisimde beıbit ómir súrýde. Qazaqstan árqashan gúldene bersin, Sizderdiń urpaq soǵys pen onyń zardabyn eshqashan kórmesin», - dedi Ádish Ábdiraıymov.

Aıta ketý kerek, búgin Almatyda Memleket basshysy qurmetti qaraýylmen birge Dańq Memorıaly janyndaǵy Máńgilik alaýǵa gúl shoqtaryn qoıdy jáne bir mınýttik únsizdikpen Ekinshi dúnıejúzilik soǵysta qaza bolǵandardy eske aldy. Nursultan Nazarbaev kezdesken soǵys ardagerlerimen jáne tyl eńbekkerleriniń arasynda Ádish Ábdiraıymov ta boldy.