Baýyrjan Baıbek saılaý qorytyndysyna qatysty pikir bildirdi
«Ortalyq saılaý komıssııasy parlamenttik saılaýdyń qorytyndy nátıjesin jarııalady. «Nur Otan» partııasy 71,09% daýys jınady. Barlyq deńgeıdegi máslıhattar saılaýynda da biz aıqyn jeńiske jettik. Elbasy, partııa Lıderi Nursultan Nazarbaev atap ótkendeı, «Nur Otan» partııasynyń basty maqsaty – halyqtyń turmysyn jaqsartý jáne eldigimizdi nyǵaıta berý. El bolyp birige bilsek, alynbaıtyn asý joq. Basymyzǵa túsken qıyndyqtardy biz árdaıym birge eńserip, jetistikterge birlese jetemiz». Bizdiń «Ózgerister joly: Ár azamatqa laıyqty ómir!» atty saılaýaldy baǵdarlamamyz – elimiz ben óńirlerdi aldaǵy 5 jylda damytýdyń daıyn jospary. Ol Elbasynyń 5 ınstıtýtsıonaldyq reformasynyń baǵdaryn jalǵastyrady jáne Memleket basshysy Qasym-Jomart Toqaevtyń Qazaqstan halqyna Joldaýynda qoıylǵan mindetterdi qamtıdy. «Nur Otan»-nyń baǵdarlamasy – egjeı-tegjeıli eseptelgen, qarjylyq jáne naqty resýrstarmen qamtylǵan sharalar», - dedi Baýyrjan Baıbek.
Onyń aıtýynsha, alǵash ret josparlaý tásili de ózgerdi.
«Munda salalyq emes, strattyq qaǵıdat negizge alyndy. Bul rette naqty áleýmettik toptardyń múddesi basty nazarda bolady. Elbasy aıtqandaı, endi partııamyz saılaýaldy ýádelerdiń jáne Memleket basshysynyń pandemııa saldary men ekonomıkalyq daǵdarysty eńserý boıynsha qoıǵan mindetteriniń barlyq deńgeıde iske asyrylýyn qamtamasyz etýi tıis. Aldymyzda atqaratyn aýqymdy jumys bar. Dostar! 10 qańtarda saılaý ýchaskelerine kelip, «Nur Otan» partııasyna daýys berý arqyly jasampazdyq pen Qazaqstannyń órkendeý jolyn tańdaǵan barsha azamatqa taǵy da alǵys aıtamyn», - dep tolyqtyrdy ol.