Baýyrjan Baıbek Nur Otan elorda turǵyndaryna arnap qandaı sharýalar isteıtinin aıtty

NUR-SULTAN. QazAqparat – «Nur Otan» partııasy Tóraǵasynyń birinshi orynbasary Baýyrjan Baıbek elorda turǵyndarymen birge «Birge – Taza Qazaqstan» ekologııalyq aktsııasyna qatysty, dep habarlaıdy QazAqparat.

Partııanyń Ortalyq apparatynyń qyzmetkerleri Shyńǵys Aıtmatov atyndaǵy kósheniń boıyna 80 túp aǵash otyrǵyzdy. Ákimdiktiń deregi boıynsha, bıyl qalada barlyǵy 1 mln-nan astam jasyl jelek otyrǵyzý josparlanǵan.

«Qurmetti dostar! Ózderińizge málim, elordamyzdyń negizi qalanǵan sátten bastap Elbasy, memleketimizdiń Tuńǵysh Prezıdenti Nursultan Nazarbaev qalanyń sáýlettik kelbetine ǵana emes, sonymen qatar naǵyz jaıly qalalyq orta qurýǵa da erekshe nazar aýdardy.

Búginde munda kóptegen saıabaq, skverler men alleıalar salynyp, qalalyqtardyń súıikti demalys oryndaryna aınaldy. Qalada da, sonymen qatar onyń mańaıynda da josparly túrde jasyl jelekter sany artyp keledi. Qolaıly klımattyq jaǵdaı qalyptastyrýda Elbasy bastamashylyq etken elorda mańynda «jasyl beldeý» qurý jobasynyń mańyzy zor», dep jazdy Baýyrjan Baıbek Facebook -tegi paraqshasynda.

Onyń aıtýynsha, ekologııa sapasyn jaqsartý máselesi «Nur Otan»-nyń saılaýaldy baǵdarlamasynyń da negizgi baǵyttarynyń biri.

Taıaýdaǵy 5 jylda partııa el kóleminde orman alqabyn ulǵaıtý jáne 2 mlrd-tan astam aǵash otyrǵyzý mindetin qoıyp otyr. Qalalar aýasynyń sapasyn jaqsartý, sý resýrstaryn utymdy paıdalaný, qaldyqtardy qaıta óńdeý boıynsha jumystar jalǵasýda.

Osyǵan oraı 2025 jylǵa deıin Nur-Sultanda, Almatyda, Shymkentte, Atyraýda, Tarazda jáne Aqtóbede 6 qoqys óńdeý zaýytyn iske qosý josparlanyp otyr.

«Nur Otan»-nyń ekologııalyq saıasatyn iske asyrý aıasynda Almatydaǵy JES-2-ni gazǵa aýystyrý, Oral ózeni basseıniniń ekojúıesin saýyqtyrý baǵdarlamasyn qabyldaý jáne kólderdi tazartý boıynsha jumystar júrgizý josparlanýda. Shóleıttenýdiń, burynǵy Semeı ıadrolyq synaq polıgonynyń, Baıqońyr ǵarysh aılaǵynyń jáne Aral teńiziniń soltústik bóligin qalpyna keltirýdiń ekologııalyq máselelerin sheshý jalǵasyn tabady», -dedi ol.

Partııanyń saılaýaldy baǵdarlamasy boıynsha elordada bes turǵyn alqapta 10 skver salý, jaǵalaý jıegin abattandyra otyryp, Aqbulaq jylǵasynyń arnasyn rekonstrýktsııalaý, Vıacheslav jáne Qoıandy sý qoımalarynda tabıǵatty qorǵaý sharalaryn iske asyrý jáne taǵy da basqa kóptegen sharalar kózdelgen.