Baýyrjan Baıbek Qostanaı oblysyndaǵy qoǵam belsendilerimen kezdesti

QOSTANAI. QazAqparat – «Nur Otan» patrııasy tóraǵasynyń birinshi orynbasary Baýyrjan Baıbek Qostanaı oblysyna sapar barysynda qoǵam belsendilerimen jáne praımerız qatysýshylarymen kezdesti, dep habarlaıdy QazAqparat.

Jıynda «Nur Otan» partııasynyń taıaýdaǵy 5 jylǵa arnalǵan óńirlik saılaýaldy baǵdarlamasynyń jobasy talqylandy.

«Elbasy, partııa Lıderi N.Á. Nazarbaevtyń tapsyrmasymen partııaishilik saılaý ótkizý kezinde elimiz boıynsha azamattardan 20 myńnan astam usynys jınaldy. Olardyń myńnan astamy Qostanaı oblysynyń turǵyndarynan tústi.

Taldaý kórsetkendeı, adamdar negizinen aýyl ishindegi joldardyń sapasy, sýmen jáne gazben qamtý, turǵyn úı men bilim berý nysandaryn salý, aýyldyq mektepterde kompıýter tehnıkalaryn jańartý máselelerin kóterýde. Turǵyndardyń aýyldaǵy ınternettiń jyldamdyǵyna da kóńilderi tolmaı otyr. Kóterilip otyrǵan máselelerdiń ózektiligin eskerip, olardy oblystyq saılaýaldy baǵdarlamaǵa mindetti túrde qosý qajettigi jaıynda pikirimdi aıttym.

Óńir halqynyń úshten biri aýyldyq jerde turatyndyqtan, partııanyń Qostanaı oblysy boıynsha saılaýaldy baǵdarlamasy aýyl sharýashylyǵyn aıtarlyqtaı qoldaý sharalaryn kózdeıdi. Atap aıtqanda, taıaýdaǵy 5 jylda oblysta egis alqaptarynyń qurylymyn ártaraptandyrýdy qamtamasyz etý, jańa sýarmaly jerlerdi aınalymǵa engizý, tehnıkany jańartý, sondaı-aq óńdeýshi aýyl sharýashylyq kásiporyndaryn iske qosý jáne jańǵyrtý josparlanýda», - dedi Baýyrjan Baıbek jelidegi paraqshasynda kezdesý týraly.

Sondaı-aq, B. Baıbek «Olja Sadchıkovskoe» aýyl sharýashylyǵy kásipornynyń qyzmetimen tanysty.

«Memleket basshysy Q.K. Toqaev el halqyna Joldaýynda damyǵan aýyl sharýashylyǵynsyz básekege qabiletti ekonomıka qurý múmkin emestigin atap ótti. Osyǵan baılanysty óńirdi tabıǵı sútpen jáne joǵary sapaly ashytqan sút ónimderimen qamtamasyz etip otyrǵan «Olja Sadchıkovskoe» aýyl sharýashylyǵy kásipornynyń qyzmetimen tanystym. Bul kásiporyn – 320 adamdy turaqty jumys ornymen qamtamasyz etip otyrǵan óńirdegi damyǵan joǵary tehnologııaly óndirýshilerdiń biri.

Kásiporyn qyzmetkerlerimen suhbattasý barysynda birqatar ótinishterdi baqylaýǵa aldym. Mysaly, Sadchıkovka aýylynyń turǵyny Tamara Kısıleva osy eldimekendegi jalpy uzyndyǵy 6 km bolatyn eki ortalyq kóshege jóndeý júrgizýdi ótindi. Bul kóshelerdiń boıynda 1350-deı turǵyn bar», - dedi ol.

⠀

Sonymen qatar, patrııasy tóraǵasynyń birinshi orynbasary jumys saparynyń sońynda Qostanaı qalasyndaǵy jańa modýldi ınfektsııalyq aýrýhanamen tanysty. Onda óńirdiń medıtsına qyzmetkerlerimen birge densaýlyq saqtaý uıymdarynyń koronavırýs pandemııasynyń týyndaýy múmkin ekinshi tolqynyna daıyndyǵy jaıy talqylandy.