Baýyrjan Baıbek: El Prezıdenti birden bir durys sheshim qabyldady
***
«Elimiz alǵash ret buryn sońdy bolmaǵan aýqymdaǵy lańkestikke tap boldy. Ahýal barǵan saıyn kúrdelene tústi. Beıbit túrde bastalǵan mıtıngini destrýktıvti kúshter men arandatýshylar paıdalanyp, jazyqsyz jandardyń qany tógildi, memleket pen azamattarǵa orasan zor moraldyq jáne materıaldyq zııan keltirildi. Jaǵdaıdyń ýshyǵýyna jaýapsyz, bálkim, yqtımal belsendiler shoǵyrynyń qasaqana áreketi jol asha tústi.
Keshe Memleket basshysy Qasym-Jomart Kemeluly Toqaev aǵymdaǵy ahýalǵa dál baǵa berip, qaýipsizdikti qamtamasyz etý, azamattardyń ómirin qorǵaý jáne eldegi jaǵdaıdy turaqtandyrý boıynsha naqty tapsyrmalar berdi.
Qalyptasqan jaǵdaıda el Prezıdenti lańkester men buzaqylarǵa qatysty barynsha qatań shara qoldaný jóninde birden bir durys sheshim qabyldady. Konstıtýtsııanyń kepili retinde Memleket basshysy Qazaqstan Respýblıkasynyń azamattaryn qorǵaý jáne quqyqtyq tártipti qalpyna keltirý úshin barlyǵyn jasaýda. Adam ómirinen qymbat esh nárse joq! Eń damyǵan demokratııalyq elderdiń ózinde adamdar qyrǵynǵa ushyraǵan lańkestik aktiler jaǵdaıynda barynsha qatań sharalar qabyldanady.
El Prezıdentiniń tapsyrmasymen qurylǵan tergeý toby sebepterdi saralap, barsha kinálilerdi anyqtaıtynyna senimdimin. Lańkester, maroderler, arandatýshylar, sondaı-aq uıymdastyrýshylar zańǵa sáıkes qatań qylmystyq jaýapqa tartylatyn bolady.
Osy kúnderi nurotandyqtar halyqpen birge aldyńǵy shepten tabylýda. Qalyptasqan ahýalǵa oraı bizdiń fılıaldarymyz ben qoǵamdyq qabyldaý bólmelerimiz qarqyndy jumys isteýde. Depýtattar, belsendiler men volonterlar jergilikti jerlerde ákimdikterge kómek kórsetýde. Alda qıraǵan qalalardy qalpyna keltirý jáne zardap shekkenderge ataýly kómek kórsetý boıynsha kóp jumys tur. Bıleýshi partııa retinde «Nur Otan» osyǵan óziniń barlyq uıymdyq, kadrlyq jáne basqa da resýrstaryn baǵyttaıdy.
Búgin Elbasy Nursultan Ábishuly Nazarbaev aıtqandaı, osynaý syn-qaterlerdi eńserip, elimizdiń tutastyǵy men qaýipsizdigin qamtamasyz etý úshin barshamyz Memleket basshysy Qasym-Jomart Kemeluly Toqaevtyń mańaıyna toptasýymyz kerek.
Barsha qazaqstandyqtardy arandatýlarǵa boı aldyrmaı, aýyzbirshilik tanytyp, quqyq qorǵaý jáne jergilikti atqarý organdaryna jan-jaqty kómek kórsetýge shaqyramyn.
Barsha qaza tapqan jandardyń otbasylary men jaqyndaryna qaıǵylaryna ortaqtasyp, partııa atynan kóńil aıtamyz.
Bizdiń kúshimiz birlikte! Qıyndyqty eńserip, jeńiske birge jetemiz!», - dep jazdy Baýyrjan Baıbek.