Baýyrjan Baıbek balshyq keship júrgenderdiń máselesin sheshpek

ALMATY. QazAqparat - Almaty ákimi Baýyrjan Baıbek megapolıstiń shet aımaqtaryn abattandyrý, joldardy salý men jóndeý jumystaryn barynsha qarqyndy júrgizýdi tapsyrdy, dep habarlaıdy QazAqparat tilshisi.

Baýyrjan Baıbek aýdan turǵyndarynyń shaǵymyna nazar aýdardy.

Qalanyń shet aýdandaryndaǵy birqatar kóshede asfalt salynbaǵan. Nátıjesinde adamdar balshyq keshýge májbúr. Sońǵy aıda 110 shaǵym túsken. Keıbir yqsham aýdandarda ınjenerlik jelilerdi júrgizgen merdigerlerdiń jaýapsyzdyǵynan keleńsiz jaǵdaılar qalyptasqan.

«Maǵan Alataý aýdanynyń turǵyndarynan shaǵym jıi túsedi. Adamdardy qınamaı, jaǵdaıdy túzetý qajet. Osyǵan oraı, 12 yqsham aýdanda jol salý úshin respýblıkalyq bıýdjetten josparlanǵan 3 mlrd teńgege qosa Strategııa jáne bıýdjettik josparlaý basqarmasyna birqatar jobalardy ońtaılandyryp, jergilikti bıýdjetten taǵy 4 mlrd teńge bólýdi tapsyramyn. Aýdan ákimi tıisti basqarmalarmen birge jumystyń sapasy úshin jeke jaýap beredi. Men jıi baryp, atqarǵan jumystaryńdy tekserip turamyn», - dedi Baýyrjan Baıbek «Nur Otan» partııasy qalalyq bıýrosynyń jıynynda.

Osylaısha, Alataý aýdanyndaǵy «Aqbulaq», «Qarasý», «Uljan-2», «Alǵabas-AZTM», «Áıgerim-1», «Áıgerim-2», «Uljan-1», «Shańyraq-1», «Shańyraq-2», «Tomırıs», «Darhan-Baıbesik», «Kók Qaınar» yqsham aýdandaryndaǵy 440-tan astam kóshege uzyndyǵy 120 km bolatyn joldar salynady jáne jóndeledi.

Aıta keterligi, jaqynda Baýyrjan Baıbek aldaǵy kezde jóndeletin joldar men trotýarlarǵa qatysty jumys keńesin ótkizgen edi. Bıyl uzyndyǵy 111 km bolatyn 120-dan astam kóshege aǵymdaǵy ortasha jóndeý jumystary júrgiziledi.

Bulardan ózge, qala basshysy ashyq qalǵan lıýktar men beti jabylmaǵan orlarǵa qatysty shaǵymdardyń jıi túsetinin, mundaı keleńsizdikterdiń ortalyq dańǵyldar men aýdandyq máni bar kóshelerinde oryn alǵanyn atap ótti.

Qalalyq mobıldilik basqarmasynyń basshysy Saǵyndyq Telibaev aýa raıy qolaıly bolsa barlyq magıstraldi kóshelerde aǵymdaǵy jóndeý jumystarynyń 10 kún ishinde júrgiziletinin aıtty.

Sońǵy 10 jyl ishinde qalaǵa qosylǵan Alataý aýdanyn damytýǵa bılik 434 mlrd teńge bólgen. Sonyń arqasynda munda 12 mektep, 5 emhana, 16 memlekettik jáne 151 jeke balabaqsha, «Aqbulaq», «Alǵabas-6», «Saıaly» yqsham aýdandary, birqatar sport jáne mádenı keshender, onyń ishinde «Almaty Arena», «Alataý» dástúrli óner teatry boı kóterdi. Infraqurylymdy damytý úshin 223 km elektr, 276 km gaz jelileri, 688 km sý, 453 km káriz qubyrlary tartyldy. 93 km jol jáne úsh jolaıryq salyndy.