Baýyryn óltirý jaqsy nyshan emes - Murat Áýezov Qordaıdaǵy oqıǵa týraly

NUR-SULTAN. QazAqparat – Tanymal qoǵam qaıratkeri Murat Áýezov Jambyl oblysynyń Qordaı aýdanynda bolǵan qaıǵyly oqıǵa týraly pikir bildirdi, dep habarlaıdy QazAqparat.

«Men úshin qaıǵyly kúnder ótip jatyr. Qordaıda baýyr baýyryn óltirdi. Adam óldi. Úıler órtendi. 90-jyldary dúngen mektepteriniń birin qorǵap edim.

Jerimiz ekspansııaǵa túsken kez kelgen jaǵdaıda dúngender myńjyldyq jaýyngerlik tájirıbesimen bizdiń jaqtasymyz boldy jáne bola beretinine senimdimin. Qazaq jáne qyrǵyz jerleri olardyń eńbekqorlyǵy men ekken egini úshin razy.

Bizdiń dinimiz ortaq. Ortalyq Azııa aspany astynda bárimiz teńbiz. Baýyryn óltirý - jaqsy nyshan emes. Baýyryn óltirgender óziniń jáne urpaqtarynyń ómirine qarǵys arqalaıdy. Buryn solaı bolǵan jáne solaı bolyp qala beredi», - dedi Murat Áýezov.

Eske sala keteıik, 7 aqpanda Jambyl oblysy Qordaı aýdanyndaǵy Masanchı aýylynyń turǵyndary arasynda jappaı tóbeles boldy. Kóp ótpeı Prezıdent Qasym-Jomart Toqaev Jambyl oblysy Qordaı aýdanynda bolǵan jappaı tóbeleske qatysty pikir bildirgen-di.

«Jambyl oblysy Qordaı aýdanynda buzaqylyq sıpattaǵy jappaı tóbeles boldy. Ony arandatýshylar óz paıdasyna qoldanbaq bolǵan. Polıtsııa jaǵdaıdy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady» dep jazdy Qasym-Jomart Toqaev Twitter paraqshasynda.

Keshe Memleket basshysy Jambyl oblysyndaǵy oqıǵaǵa baılanysty málimdeme jasady.

Arnaıy Úkimet komıssııasy qurylyp, Jambyl oblysyna kelip jetti. Al Іshki ister mınıstrligi Qordaıdaǵy qaqtyǵystan 10 adamnyń kóz jumǵanyn rastady.