Baýyrlas eldermen bolashaǵymyzdy bóle-jara qaramaımyz - Prezıdent

ASTANA. QazAqparat – Qazaqstannyń basqa eldermen qarym-qatynasy birlik pen tatýlyqqa negizdelýi kerek. Bul týraly Qazaqstan halqy Assambleıasynyń HHHІІ sessııasynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Qazaqstannyń basqa eldermen qarym-qatynasy da birlikke, tatýlyqqa jáne ózara tilektestikke negizdelýi kerek. Ásirese kórshiles, baýyrlas eldermen bolashaǵymyzdy bóle-jara qaramaımyz. Jaqynda Qyrǵyz Prezıdenti Sadyr Japarov áleýmettik jelide qazaq pen qyrǵyzdyń dostyǵy týraly lebizin bildirdi. Shyn máninde, biz tamyrlas, taǵdyrlas, bir týǵan jurtpyz. Qıyndyqty birge eńserip, qýanyshty birge bólisip, qıly zamannyń bárinen ótip kelemiz», - dedi Qasym-Jomart Toqaev.

Memleket basshysy uly Abaıdyń «esh qazaq qyrǵyz ben qazaqtyń bir tuqymdas ekenine talaspaıdy» degen sózin mysalǵa keltirip ótti.

«Muhtar Áýezov «Manas» jyryn ıdeologııalyq turǵydan qutqarýǵa erekshe eńbek sińirgen. Moldaqylysh pen Shyńǵys Aıtmatovqa óz baýyryndaı arasha túsken. Bul eki eldiń erekshe jaqyndyǵyn jáne janashyrlyǵyn aıqyn kórsetedi. Shyńǵys Aıtmatov shyǵarmalaryndaǵy oqıǵalar jáne keıipkerler qazaq jerimen tyǵys baılanysty. Alataýdyń bókterin qatar jaılaǵan egiz halyq bolashaqqa birge qadam basa beredi. Men buǵan kámil senemin. Biz basqa da baýyrlas eldermen, kórshi memlekettermen qarym-qatynasty osyndaı deńgeıde jalǵastyrýymyz kerek», - dedi Prezıdent.