Baýyrlas elder Qazaqstanǵa qandaı kómek kórsetti
Qazaqstannyń birqatar óńirin sý basqanda qyrǵyz aǵaıyn alǵashqylardyń biri bolyp kómek kórsetýge asyqty. Olar 300 tonna azyq-túlik pen ózge de qajetti zattar tıelgen 15 júk kóligin jiberdi. Gýmanıtarlyq kómek sý basqan Aqtóbe, Atyraý, BQO jáne Qostanaı oblystaryna jetkizildi.
«Muny birtýǵandyq járdem dep aıtýǵa bolady. Bul járdem týraly bizdiń elshilik bastama kóterip, jaǵdaıdy úlken alańmen baqylap otyrdyq jáne Bishkekke habar berip otyrdyq. Gýmanıtarlyq kómek jiberý týraly sheshimdi Prezıdentimiz Sadyr Japarov qabyldady. Az ǵana ýaqytta jylý jınalyp, eki lek kómek Qazaqstanǵa jiberildi. Ásirese tasqyn sýdan kóbirek zardap shekken Aqtóbe, Atyraý oblystaryn tańdadyq», — dedi Qyrǵyzstannyń Qazaqstandaǵy tótenshe jáne ókiletti elshisi Dastan Dıýshekeev telearnaǵa bergen suhbatynda.
Tájikstannyń Dýshanbe men Hýdjand qalalarynan 61 vagon men 13 júk mashınasy jiberildi. Munda 3 500 tonna gýmanıtarlyq kómek qamtylǵan. Munymen de shektelmeı, birneshe kúnnen keıin qurylys materıaldary men kıim-keshekke toly 16 vagon taǵy keldi.
Ózbek eli de bizdi nazardan tys qaldyrmady. Joǵary Shyrshyq eldimekeni júzdegen lıtr ósimdik maıy men tósek-jabdyq jıystyrdy jáne arnaıy esepshotqa 2 mln teńge aýdardy. Turmysqa qajet qural-saımandary men úrlemeli qaıyq, rezeńke etik jáne gıgıenalyq zattar taǵy bar.
Ingýshetııa Respýblıkasy 20 tonna aýyz sý asarlatty. Olar Qazaqstan halqy Assambleıasynyń «Júrekten júrekke» qaıyrymdylyq sharasyna osylaı úlesin qosty.
«Óńirde tirshilik nárinen tarshylyq bolyp jatyr degendi estigen soń, taýdyń taza móldir sýyn jibereıik degen ortaq sheshimge keldik. Júk kóligimiz ótken sársenbi kúni shyqty. Jol alys bolǵan soń, azdap ýaıymdaǵanamyz ras. Degenmen dittegen jerge aman-esen jetti», — deıdi QHA Kásipkerler qaýymdastyǵynyń vıtse-prezıdenti Djambýlat Tangıev.
Alys-jaqyn sheteldegi qandastardyń atamekenin sý shaıǵanda júregi shaılyqqany anyq. Omby oblysyndaǵy qazaqtar «syn saǵatta tarıhı Otanymyzǵa qol ushyn sozý paryzymyz» dep 55 tonna júk jóneltti. Olar arnaıy esepshot ashyp, eldiń kerek-jaraǵyna áli de qarjy jınap jatyr.
«Saýaby mol iske birneshe ret qatysyp jatyrmyn. Sebebi Qazaqstandaǵy sý tasqynynan kelgen shyǵyn úlken. Bárimiz aýyzbirshilik tanytyp, qıyn kezde kómektesemiz dep sheshtik, sý jáne gýmanıtarlyq kómek jetkizdik. Qazaqstanda turatyn týystarmen, dostarmen únemi baılanystamyz. Bári artta qalsyn», — deıdi Omby qalasynyń turǵyny Aıdar Ǵusmanov.
Mońǵolııadaǵy órimdeı jastar da ónege kórsetip, tıyn-tebenin býyp-túıip, kómegin berdi. Syn saǵatta súıeý bolǵan aǵaıynnyń demeýi kóńilden eshqashan óshpeıdi. Sý basqan eldi mekenderge jekelegen shet el azamattary da qol ushyn sozdy.
Sondaı azamattardyń biri — AQSh-tyń ońtústik Lýızıana shtatynan kelgen maman Djon Fell. Ol jergilikti munaı kompanııasynda jumys isteıdi jáne 60-qa jýyq áriptesimen birge jergilikti turǵyndarǵa kómek kórsetip, kópshiliktiń ortasynan tabyldy.
«Bizdiń Lýızıana shtatynda jylyna 3-4 ret sý tasıdy. Sondyqtan tasqynmen kúreste biraz tájirıbem bar. Bar biletinimdi Jaıyq jaǵasyn bekitýde paıdalanyp jatyrmyn. Atyraý meniń ekinshi úıim bolyp ketti. Otbasym da osynda. Osy jerdegi jumysty aıaqtap bolǵan soń, turǵyn jaıymdy qorǵaýǵa baramyn», — dedi D. Fell.
Sondaı-aq, daǵystandyq Omarashab Ahmedov ta eldiń yqylasyna bólendi. Ol túngi saǵat 2-de dosynyń qoımasynda saqtalǵan 50 myń qapshyqty júk kóligine tıep, Astrahan asyp, Atyraýǵa kelip, turǵyndarmen birge bóget jasaýǵa kómektesti.
Sportshy Abzal Ájiǵalıev bastaǵan azamattar jerlesterimen birge sý basqan aımaqtardǵy belsindelimermen birge baryp, oqıǵanyń bel ortasynda júrdi.
Alǵashqylardyń biri bolyp, árıne halyqtyń súıiktisi Dımash ta bardy jáne qarjylaı kómek berdi.
Buǵan deıin Kazinform agenttigi tasqynnan japa shekken halyqqa otandyq shoý-bıznes juldyzdary qandaı kómek bergenin jazdy.
Aıta keteıik, Prezıdent Qasym-Jomart Toqaev tabıǵı apatta tileýlestik tanytqan baýyrlas halyqtardyń basshylarymen telefon arqyly tildesip, alǵys bildergen bolatyn.