Batysqazaqstandyqtar jazýshy Qaıyr Quraqulandy eske aldy
Shara barysynda bıylǵy 5 naýryzda týǵanyna 80 jyl tolatyn jazýshynyń jańa kitaby tanystyryldy. Qalamgerdiń zaıyby, ardager-ustaz Nadejda Jubaıqyzy qurastyrǵan kitapqa Qaıyr Quraqulannyń shyǵarmalary men oı-tolǵanystary jáne zamandastarynyń jazǵan estelikteri, arnaý óleńderi engizilgen.
Keshte aqyn, Qazaqstan Jazýshylar odaǵy BQO bólimshesiniń tóraıymy Aqushtap Baqtygereeva Qaıyr Quraqulannyń ádebı murasy mol ekendigin, onyń kitaptaryn, ásirese, keıingi urpaq oqyp, oı túıýi tıis ekendigin atap ótti. «Kitap oqymaǵannyń oıy sholaq bolady. Qazir ǵalamtor jaılaǵan zaman bolǵanymen, árbir jas eliniń tarıhyn, ádebıeti men mádenıetin umytýy tıis emes. Kishkentaıynan ata-baba dástúrine adal bolyp, taza ómir súrip qana qoımaı, ultqa, qoǵamǵa degen kózqarasyn, Otanǵa degen mahabbatyn kórkem týyndylary arqyly kórsete bilgen Qaıyr Quraqulandaı biregeı tulǵalardy qalaı qurmettese de, jarasady», dedi aqyn.
Sharada sondaı-aq jýrnalıstıka ardageri Bazarǵalı Qýatov, qalamgerdiń dosy Temirǵalı Sultanǵalıev, qalamdas inileri Baýyrjan Ǵubaıdýllın, Bolatqalı Tólebaev jáne basqalary estelikterimen bólisip, shynaıy tilekterin jetkizdi.
Aıta keteıik, Batys Qazaqstannyń Taıpaq aýylynda ómir esigin ashyp, Oral qalasyndaǵy S.Seıfýllın atyndaǵy orta mektepti altyn medalmen bitirgen Qaıyr Quraqulan 1960 jyly QazPI-diń fızıka-matematıka fakýltetin úzdik támamdaǵannan keıin eńbek jolyn aýyl mektebinde muǵalimdikten bastady. Keıin jarty ǵasyrdaı ýaqyt boıy Batys Qazaqstan aýyl sharýashylyǵy ınstıtýtynda (qazirgi Jáńgir han atyndaǵy BQATÝ) ustazdyq etip, talaı shákirtti tárbıeleı bildi. Sonymen qatar jazýshylyqty ómirlik serik etken Qaıyr Quraqulan kózi tirisinde-aq kóptegen kitaptardy jaryqqa shyǵardy. 1982 jyldan Qazaqstan Jazýshylar odaǵynyń múshesi atanǵan qalamger «At jaly» povesi úshin 1976 jyldyń qorytyndysy boıynsha respýblıkalyq «Jalyn» jýrnaly jabyq báıgesiniń júldegeri atandy. «Babanazar teregi», «Іzgilik joly», «Qaterli qııada», «Keri tolǵaý», «Qatqaq», «At jaly» syndy kitaptarmen qatar til men din taqyrybynda kólemdi maqalalar da jazdy.