Batysqazaqstandyqtar tájik-aýǵan shekarasynda erlikpen kóz jumǵandardy umytpaıdy
«Batys» óńirlik qolbasshylyǵynyń baspasóz hatshysy, podpolkovnık Erbolat Sultanovtyń aıtýynsha, kúshi áldeqaıda basym jaýmen sol qııan-keski shaıqasta 17 jaýynger qaza taýyp, 33-i túrli jaraqat alǵan bolatyn. Starshına Qalqaman Baqbaev, serjant Radık Qaımýldıev, kishi serjant Álıhan Ógizbaev, qatardaǵy jaýyngerler Erjan Ábdıev, Erjan Baıǵabysov, Erkin Baıǵabylov, Erbol Bekebaev, Baýyrjan Dalabaev, Jaqsylyq Jansúgirov, Imomadın Jumatov, Qanat Edyryshev, Erbol Isabaev, Erkebulan Maqajanov, Mıhaıl Martynenko, Anatolıı Meshkov, Dastan Nurmetov, Tahır Raıymjanovty qazaqstandyqtar eshqashan umytpaıdy. Olardyń bári de erlikpen qaza tapqannan keıin ekinshi dárejeli «Aıbyn» ordenimen marapattaldy. Sonyń ishinde BQO-nyń Shyńǵyrlaý aýdanynan attanǵan Radık Qaımýldıev te bar.
On jeti jaýyngerdiń qurmetine ornatylǵan eskertkishke gúl shoqtary qoıylyp, saltanatty jıynda «Batys» óńirlik qolbasshysynyń mindetin atqarýshy, polkovnık Arman Jumaǵalıev, ardagerler keńesiniń tóraǵasy, doǵarystaǵy podpolkovnık Baqytjan Berdıev, BQO aýǵan soǵysy múgedekteri men ardagerleri qoǵamynyń tóraǵasy Tahır Qosjanov, tájik-aýǵan oqıǵalary ardagerleri odaǵynyń tóraǵasy Dáribek Súleımenov, R.Qaımýldıevtiń ákesi Baqtygereı Qaımýldıev batyrlardyń el esinde máńgi qalatynyn jetkizdi.
Aıta keteıik, tájik-aýǵan shekarasynda áskerı boryshyn ótegenderden qazirgi tańda «Batys» óńirlik qolbasshylyǵy bólimderinde polkovnık Berik Omarov, kapıtan Qaırat Joldyǵulov, leıtenant Sergeı Gafarov qyzmet atqarýda. Al doǵarystaǵy podpolkovnık Oleg Leonenko men praporşık Qanat Álipov qurmetti demalysta.
Erlik kúnine oraı sharalar Ulttyq ulannyń barlyq bólimderinde uıymdastyrylyp, minsiz qyzmet atqaryp júrgen jaýyngerler gramota, baǵaly syılyqtarmen marapattaldy.