Batysqazaqstandyqtar Naýryzdy keńinen atap ótýde
Alańǵa jınalǵan Aq Jaıyq jurtshylyǵyn oblys ákiminiń orynbasary Igor Steksov pen Oral qalasynyń ákimi Murat Muqaev quttyqtady.
«Ulystyń uly kúni - Naýryz qutty bolsyn, aǵaıyn! Aýa raıynyń salqyndyǵyna qaramastan, keńinen toılanyp jatqan Naýryz barshaǵa jylylyq, qut-bereke ákelsin. Naýryz merekesin qazaq halqy ózge ult ókilderimen birge toılap keledi. Osynyń bári - táýelsizdik pen el birliginiń arqasy. Birliktiń nátıjesinde Qazaqstan álemnen óz ornyn taýyp, úlken tabystarǵa qol jetkizýde. Elbasynyń salıqaly saıasaty men naqty baǵdarlamalary arqasynda biz Qazaqstandy qýatty memleketke aınaldyra alamyz. Buǵan ár azamattyń úles qosqany mańyzdy. Naýryz ár otbasyǵa yrys-bereke ákelsin, elimiz damyp, gúldene bersin!», dedi sózin memlekettik tilde bastaǵan Igor Steksov.
Alańda jaǵalaı kıiz úıler tigilip, ulttyq oıyndarǵa kezek berildi. «Naýryz - kóktem sálemi» atty teatrlandyrylǵan merekelik kontsert qoıyldy.
«Kontsertke 200-den astam shyǵarmashylyq ujymdary men jekelegen oryndaýshylar qatysty. Olardyń arasynda «Aqjaıyq» halyqtyq án-bı ansambli, úlgili «Qyzǵaldaqtar», «Nazerke» halyqtyq bı ansamblderi, «Ájeler sálemi», «Arý analar» ansamblderi bar. Jurtshylyqqa ulttyq taǵamdar usynylyp, halyq kóterińki kóńilmen qaýyshyp, bir-birine degen rııasyz nıet-peıilderin bildirip jatty», dedi oblystyq mádenıet, arhıvter jáne qujattama basqarmasynyń basshysy Qadyrbolat Musaǵalıev.
Naýryz merekesi sondaı-aq qalaǵa qarasty Krýgloozernyı, Zachagan, Jelaev, Derkól kentterinde jáne barlyq aýdandarda atalyp ótildi.