Batysqazaqstandyqtar Aqtóbede lańkester qolynan qaza tapqandardy eske aldy

ORAL. QazAqparat - Oral qalasyndaǵy 5517-áskerı bólim klýbynda budan bir jyl buryn Aqtóbe qalasynda lańkester shabýylyna toıtarys bergen 6655-áskerı bólim qyzmetkerleriniń erligine arnalǵan «Máńgilik sapta» sharasy ótkizildi, dep habarlaıdy «QazAqparat» tilshisi.

QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, sol kúni úsh birdeı áskerı qyzmetker, maıor Danıel Maılybaev, kishi serjant Berikjan Qalıev jáne qatardaǵy jaýynger Dosbol Sapar qazaǵa ushyraǵan bolatyn.

Memlekettik jáne qoǵamdyq uıymdar, quqyq qorǵaý organdarynyń ókilderi, ardagerler men áskerı qyzmetkerler úsh batyrdyń portretterine gúl shoqtaryn qoıyp, bir mınýt únsizdikpen eske aldy.

«Biz óz Otany úshin janyn bergen erlerdi eshqashan umytpaımyz. Olardyń batyrlyǵy keıingi urpaq úshin máńgi óshpes ónege bolyp qalady», dedi óz sózinde «Batys» óńirlik qolbasshysy, general-maıor Álibek Seralıev.

«Batys» óńirlik qolbasshylyǵy ardagerler keńesiniń tóraǵasy, doǵarystaǵy podpolkovnık Baqytjan Berdıev, qolbasshylyq basqarmasynyń bastyǵy, podpolkovnık Álisher Ábdirasyl lańkesterge toıtarys bergen áskerı qyzmetshilerdiń esimderi el esinde ekendigin, osy oraıda «Máńgilik sapta» sharasynyń QR Ulttyq ulanyna qarasty barlyq áskerı bólimde uıymdastyrylǵanyn jetkizdi.

Aıta keteıik, erlikpen qaza tapqandardyń biri, batysqazaqstandyq Berikjan Qalıevtiń otbasy (zaıyby tórt balasymen birge) qazirgi tańda Oral qalasynda turyp jatyr.