Batysqazaqstandyq jazýshy Mıra Shúıinshálıevanyń jańa kitaby jaryq kórdi

ORAL. QazAqparat – J.Moldaǵalıev atyndaǵy oblystyq ǵylymı ámbebap kitaphanasynda jazýshy, Qazaqstan Jazýshylar odaǵynyń múshesi, halyqaralyq «Shabyt» festıvaliniń laýreaty, halyqaralyq «Alash» ádebı syılyǵynyń ıegeri Mıra Shúıinshálıevanyń «Ókinish» kitabynyń tusaýy kesildi, dep habarlaıdy QazAqparat tilshisi.

Qalamgerdiń jańa kitaby memlekettik tapsyryspen Almatydaǵy «Qazaq kitaby» baspasynan basylyp shyqty.

Belgili synshy, ádebıet zertteýshisi Baqyt Sarbalauly «Ókinish» povesin roman dep baǵalasa, fılologııa ǵylymdarynyń doktory, professor Gúljahan Orda arnaıy maqala jazǵan bolatyn.

Mıranyń basqa da týyndylary tanymal jazýshylar men ádebı qaýym tarapynan laıyqty baǵasyn alyp úlgerdi.

Osyǵan oraı QR Mádenıet jáne sport mınıstrliginiń qoldaýymen 3 myń dana taralymmen basylyp shyqqan «Ókinish» kitaby respýblıka kitaphanalaryna tegin taratyldy.

Tanystyrylym barysynda oblys ákiminiń orynbasary Serik Egizbaev óńir basshysy Ǵalı Esqalıevtiń atynan gúl shoǵyn tabys etip, prozaıktyń qalamynan jańa týyndylardyń ómirge kele berýine tilektestigin bildirdi.

«Kitap jazý eshqashan ońaı bolmaǵan. Sizdiń týyndylaryńyzǵa Ábdijámil Nurpeıisov, Dýlat Isabekovteı aǵa býyn ókilderi joǵary baǵasyn berdi. Arnaıy maqalalar jazylyp, ádebı týyndylaryńyz zerttelip jatyr. Aldaǵy ýaqytta budan da bıik tabystarǵa qol jetkizýińizge tilektespiz» dedi Serik Rahmetollauly.

Oral qalasynyń ákimi Abat Shynybekov Mıra Shúıinshálıevanyń jazýshylyq eńbekpen aınalysyp qana qoımaı, jýrnalıstıka salasynda da jemisti qyzmet atqaryp kele jatqanyn, ásirese, qazirgideı indet kezinde az adammen qalalyq «Jaıyq úni» gazetin sapaly shyǵaryp otyrǵanyn atap ótti.

«Mıra – qazirgi qoǵamnyń tynys-tirshiligin, túrli adamdar taǵdyryn, ásirese, qazaq qyzy men áıeliniń basyndaǵy jaı-kúıin shyǵarmasyna arqaý etip júrgen qalamger. Gazet shyǵara júrip, kitap jazý ońaı emes. Proza salasynda óndire eńbek etip júrgen qazaq qyzdary kóp emes, sonyń biri – Mıra» dedi aqyn, Memlekettik syılyqtyń ıegeri Aqushtap Baqtygereeva.

Pedagogıka ǵylymdarynyń doktory, professor Shalqyma Qurmanálına, aqyn, Qazaqstan Jazýshylar odaǵy oblystyq fılıalynyń tóraǵasy Baýyrjan Halıolla jáne basqalar Mıra Shúıinshálıevanyń qazaqtyń jazýshy qyzdary arasynda orny bólek ekendigin atap ótip, týyndylarynyń elge keńinen taralýyna tilektes ekendigin jetkizdi.

Sýretterdi túsirgen Rafhat Halelov