Batysqazaqstandyq kásipkerler kezekten tys Prezıdent saılaýyna qoldaý bildirdi

ORAL. QazAqparat - Oblystyq máslıhat depýtattary shaǵyn jáne orta bıznes ókilderimen kezdesip, aldaǵy saılaý máselesin talqylady, dep habarlaıdy QazAqparat tilshisi.

«Nur Otan» partııasy oblystyq fılıaly tóraǵasynyń birinshi orynbasary, oblystyq máslıhattaǵy fraktsııa jetekshisi Serik Súleımen málim etkendeı, kezekten tys Prezıdent saılaýyn ótkizýdi halyqtyń barlyq toptary, sonyń ishinde kásipkerler qoldap otyr.

Elbasy Nursultan Nazarbaevtyń óz ókilettigin bıylǵy 19 naýryzda toqtatqany belgili. Sodan keıin memleket tizginin óz qolyna alǵan Qasym-Jomart Toqaev kezekten tys prezıdenttik saılaý ótkizý týraly Jarlyqqa qol qoıdy.

«Osy kezge deıin Qazaqstan Elbasynyń bastaýymen kóptegen tabystarǵa qol jetkizip, álemniń damyǵan elý eliniń qataryna endi. Endigi maqsat - Tuńǵysh Prezıdenttiń sara jolyn odan ári jalǵastyrý. Bul rette bıliktiń aýysýyn eshqandaı tolqýsyz, kedergisiz ótkizýdiń mańyzy zor», - dedi Serik Súleımen.

S.Súleımen «Nur Otan» partııasynyń 23 sáýirde ótetin sezinde kandıdat usynylǵannan keıin saılaýaldy shtab jumystarynyń retimen qolǵa alynatyndyǵyn jetkizdi.

Kezdesýde sondaı-aq oblystyq máslıhat depýtattary Saltanat Tumanbaeva, Lıana Tursynova jáne basqalar óz pikir-paıymdaryn bildirdi.

«Kezekten tys prezıdenttik saılaýdyń bizder, kásipkerler úshin mańyzy zor. Barlyq jurtshylyq ókilderi sııaqty, bizderge de keregi - turaqtylyq, táýelsizdik alǵannan beri kúlli álemge málim bolǵan elimizdiń odan ári qarqyndy damýy. Sondyqtan aldaǵy saılaýǵa kásipkerler palatasy, depýtattar da belsene qatysatyny anyq. Erteńimiz jarqyn bolýy úshin óz basshymyzdy durys tańdap, saılap alýymyz kerek», - dedi kásipker Lıana Tursynova.