Batysqazaqstandyq kásipker ózi turǵan úıdi meshitke tartý etti

ORAL. QazAqparat - Qasıetti ramazan aıynda Bókeı ordasy aýdanynyń ortalyǵy Saıqyn aýylynda turatyn kásipker Medet Sıkenov ózi turǵan eki bólmeli úıdi jergilikti meshitke tartý etti, dep habarlaıdy «QazAqparat» tilshisi.

Aýdan ımamy Nazymbek Imanǵalıevtiń aıtýynsha, bes ýaqyt namazyn úzbeı, oraza ustap júrgen Medet otbasymen jańa qonysqa kóship jatqandyqtan, burynǵy úıin ishinde ózi tutynǵan jıhazdary, «Otaý tv» qondyrylǵan teledıdarymen, tońazytqysh jáne basqa buıymdarymen meshitke qaldyrýdy uıǵardy. Úıge gaz da kirgizilgen, turýǵa qolaıly.

«Bul úıde aýdanǵa keletin naıb-ımamdar aqysyz turyp, halyqqa qyzmet etetin bolady. Jalpy, meshitke jamaǵattyń kelýi jaqsy. Ramazan aıyna baılanysty aýdan basshylarynyń qatysýymen aýyzasharlar berilýde. Aldaǵy ýaqytta Medet sııaqty kásipkerlerdiń isi juǵysty bolsa deımiz. Óıtkeni aýdandaǵy úsh meshit (Saıqyn, Han ordasy, Bısende) pen Saraljyn aýylyndaǵy bir namazhana azdyq etedi. Kúni búgin Bórli, Uıaly aýyldarynda jergilikti turǵyndardyń, kásipkerlerdiń kómegimen meshit salý oılastyrylýda. Elbasymyzdyń «Bolashaqqa baǵdar: rýhanı jańǵyrý» atty maqalasynda aıtylǵanyndaı, týǵan jerimizge osyndaı jaqsylyqtar jasaı bilsek, mártebemiz de kóterile túsetini anyq», dedi «QazAqparat» tilshisine Nazymbek Imanǵalıev.