Batysqa ilesem dep ata-baba saltyn umytýǵa bolmaıdy - Elbasy
«Jastardyń boıynda áleýmettik jaýapkershilik, qorshaǵan ortany aıalaý sezimin qalyptastyrý eń negizgi mindet. Sebebi onyń barlyǵy - bolashaqtaryń. Ásirese úlkenge qurmet, kishige izet bildirýdiń, meıirimdilik pen adamgershilik qasıetterdi damytýdyń mańyzy zor. Bizdiń ata-babamyzdan qalǵan saltymyz bar. Kishiler úlkendi syılaıdy, erler áıeldi syılaıdy. Batysqa ilesemiz, demokrat bolamyz dep munyń barlyǵyn umytýymyzǵa bolmaıdy», - dedi Elbasy.
Memleket basshysy qarttar úıinde qazaqtyń ata-ájeleriniń otyrǵanyna qabyrǵasy qaıysatyndyǵyn basa aıtty.
«Qazaqta mundaı bále bolǵan joq. Ákesin, qartaıǵan sheshesin úıinde ustaıtyn. Kishi balasyn otaý ıesi dep aıtqan. Qazaqta balasyn jetimder úıine berý bolǵan joq. Mundaı jetimder úıi Qazaqstanda bolmaýy kerek. Jetim balar úıindegi balalardy asyrap alý qajet», - dedi Nursultan Nazarbaev.
Aıta keteıik, Astanada «Táýelsizdiktiń urpaqtary» ataýymen Jastar jylynyń ashylý saltanaty ótip jatyr.
Sharaǵa Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler keldi.
Eske sala ketsek, QR Prezıdenti Nursultan Nazarbaev Qazaqstan halqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn.
Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan bolatyn Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.